A po e njeh Kosovën? Deklarohet Qeveria e Spanjës

Aktuale

A po e njeh Kosovën? Deklarohet Qeveria e Spanjës

Më: 28 nëntor 2021 Në ora: 15:37
José Manuel Albares

Spanja e ka rikonfirmuar veten edhe një herë në vendimin e saj për të mos njohur pavarësinë e Kosovës, ndonëse ka mbrojtur se mban një “qasje konstruktive” për këtë çështje që kalon përmes mbështetjes së zgjidhjes me dialog të mosmarrëveshjes ndërmjet Beogradit dhe Prishtinës.

Kjo është bërë e ditur në një përgjigje parlamentare për deputeten e Junts, Mariona Illamola, e cila kishte pyetur për qëndrimin e saj në lidhje me “aspiratat e Kosovës” për të hyrë në BE.

Qeveria e Spanjës, në një përgjigje, të cilën e ka “Europa Press”,ka konfirmuar qëndrimin “për mosnjohjen e deklaratës së njëanshme të pavarësisë të miratuar nga Prishtina në vitin 2008, pasi është një akt i njëanshëm”.

Megjithatë nga Qeveria thuhet se “nga një këndvështrim konstruktiv, konsiderohet se është koha për të bërë përpjekje përfundimtare për zgjidhjen e çështjes së territorit të Kosovës në kuadër të dialogut Beograd – Prishtinë, me një marrëveshje që respekton të drejtën ndërkombëtare”.

Sa i përket aspiratës së Kosovës për të hyrë në BE, Qeveria ka thënë se është aktivisht në favor të politikës së zgjerimit të BE-së dhe beson plotësisht në nevojën për t’i dhënë një shtysë të re inkuadrimit të Ballkanit Perëndimor.

Illamola kishte pyetur Ekzekutivin edhe për Samitin e mbajtur në Slloveni mes BE-së dhe Ballkanit Perëndimor në tetor, ku mori pjesë edhe kryeministri i Spanjës, Pedro Sanchez.

Deputetja katalunase kishte pyetur nëse Qeveria konsideron se po dëmtohet imazhi i Spanjës me vendosjen e vetove ndaj flamujve e simboleve të një vendi si Kosova. Ajo i ishte referuar faktit se për të lehtësuar pjesëmarrjen e Sanchezit dhe krerëve të vendeve tjera të BE-së që nuk e kanë njohur Kosovën, u vendos të mos përdoreshin simbole në këtë ngjarje.

“Pozicioni i mosnjohjes nuk nënkupton ndërprerjen e pjesëmarrjes”, u tha nga Qeveria e Spanjës, ndërsa për pjesëmarrje ka thënë se është dashur të plotësohen disa kushte të dakorduara brenda BE-së.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat