Hekuran Murati: Normal që rritet çmimi i energjisë, sepse...

Aktuale

Hekuran Murati: Normal që rritet çmimi i energjisë, sepse...

Më: 20 janar 2022 Në ora: 18:03
Hekuran Murati

Ministri i Financave, Hekuran Murati ka thënë se është normale që nuk po menaxhohen lehtë krizat, kjo pasi vendi po përballet edhe me pandeminë.

Këto deklarata ai i bëri në Kuvendin e Kosovës derisa ishte duke folur për rritjen e çmimit të energjisë, gjë për të cilën pushteti u kritikua shumë sot nga opozita.

“Normalisht që nuk është e lehtë të menaxhojmë me këto kriza shto pandeminë, shto inflacionin, shto rritjen e çmimit të energjisë elektrikë. Edhe SHBA-ja, edhe Britania e Madhe e ka këtë sfidë, çështja është se si menaxhohet”, ka thënë ai.

Ndryshe prej Hekuran Muratit, shefi i tij, Albin Kurti fajin për krizën energjetike ua la qeverive të kaluara.

Ai madje edhe për ngritjen e çmimit të rrymës tha se faj kanë pushtetet e mëparshme.

Ndërkohë, çmimet e energjisë elektrike nuk do të jenë aspak të ulëta, derisa Zyra e Rregullatorit për Energji (ZRRE) në Kosovë i ka ndarë konsumatorët në pesë kategori: A, B, C, D dhe E.

Nëse jeni në kategorinë A dhe shpenzoni deri në 300 kWh, fatura aktuale e juaja është 19.97 euro, por me rritjen e çmimit të energjisë elektrike ajo do të bëhet 20.40 euro.

Nëse jeni në kategorinë B, ju shpenzoni 450 kWh dhe fatura e juaj aktuale është 27.37 euro, tani do të bëhet 29.66 euro.

Nëse shpenzoni deri në 600 kWh, jeni në kategorinë C dhe fatura e juaj aktuale është 35.86 euro, me çmimet e reja, ajo bëhet 38.92 euro.

Nëse jeni në kategorinë D, ju shpenzoni deri në 800 kWh, fatura aktuale është 47.19 euro, por me rritjen e çmimit fatura bëhet 74.17 euro.

Nëse jeni në kategorinë E ju shpenzoni deri në 1000kWh dhe fatura aktuale është 58.52 euro, ndërsa me rritjen e çmimit, fatura bëhet 109.42 euro.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat