Kryetari i Partisë Socialdemokrate, Dardan Molliqaj, deklaroi pas lirimit të tij se ai ishte i marrë peng dhe jo i arrestuar, duke qenë se nuk kishte fletëarrest për të.
“E para që mund të konstatoj është se unë kam qenë i marrë peng. Pra, unë jam marrë peng nga një polici e cila është dirigjuar me udhëheqje politike dhe pa urdhër të prokurorit unë jam arrestuar”, tha Molliqaj duke treguar dokumentin e procesverbalit.
Ai tha se është arrestuar me dhjetëra herë viteve të fundit, por asnjëherë pa vendim të prokurorit, për çka ka kërkuar që të nisin hetimet në lidhje me arrestimin e tij.
Molliqaj tha se duke e njohur procedurën, e ka ditur se arrestimi i tij është i jashtëligjshëm.
Sipas tij, ftesa e policisë, që është publikuar edhe nga vet institucioni, edhe me vendim gjykate është konstatuar se nuk i ka plotësuar kushtet që të llogaritet se një ftesë është dorëzuar.
Ai shtoi se ka pasur shkele të rënda në arrestimin e tij dhe për këtë do t’ju shkruajnë të gjitha ambasadave si dhe organizatave ndërkombëtare për të drejtat e njeriut.
