​Dy shtetas kosovarë në mesin e të kthyerve nga Siria

Aktuale

​Dy shtetas kosovarë në mesin e të kthyerve nga Siria

Më: 28 maj 2022 Në ora: 12:11
Foto ilustrim

Ministri i Brendshëm, Xhelal Sveçla, tregoi se dy shtetas kosovarë janë në mesin e të riatdhesuarve nga zonat e konfliktit në Siri. Ishte Ministria e Punëve të Brendshme e Shqipërisë që dha lajmin për kthimin e 13 shqiptarëve përmes Aeroportit të Prishtinës, pasi institucionet në Kosovë refuzuan të përgjigjeshin në interesimin e gazetarëve në lidhje me këtë çështje.

“Si Qeveri e Republikës së Kosovës në bashkëpunim me Qeverinë e Republikës së Shqipërisë sot kthyem dy shtetas tanë nga zonat e konfliktit në Siri. Kjo është vazhdimësi e angazhimit të Qeverisë së Kosovës për rikthimin dhe riintegrimin e qytetarëve tanë që ka filluar nga viti 2019”, shkroi Sveçla në Facebook.

Ministri i Brendshëm tha se është i lumtur që Kosova është shtet lider global në luftën kundër terrorizmit duke zbatuar kështu me përgjegjësi të lartë obligimet tona si shtet anëtar i Koalicionit Global kundër ISIS.

“Si institucione do të jemi në gjendje gatishmërie në çdo kohë dhe do të angazhohemi maksimalisht për mirëqenien e qytetarëve tanë por gjithmonë duke pasur parasysh që çdo veprim kundër ligjeve të Republikës së Kosovës dënohet sipas masave që përcaktohen nga ligjet”, shtoi Sveçla.

Në fund, ai tha se duke pasur parasysh ndjeshmërinë e këtij procesi, kërkoi mirëkuptim dhe respektim të privatësisë së të kthyerve dhe familjarëve të tyre.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat