Abdixhiku nga Gjilani: LDK është duke e përgatitur një program të ri

Aktuale

Abdixhiku nga Gjilani: LDK është duke e përgatitur një program të ri

Më: 24 shtator 2022 Në ora: 15:09
Kryetari i LDK-së, Lumir Abdixhiku

Kryetari i LDK-së, Lumir Abdixhiku, tha se partia që ai drejton është duke përgatitur programin e ri politik.

Abdixhiku deklaroi se LDK-ja ka një plan dhe ekip që po ndërtojnë programin në bashkëbisedim me qytetarët e ku, sipas tij, do t’i japin përgjigje dhe vizione të qarta e të guximshme problemeve të vendit tonë.

“Në këtë plan tonin, ne do të prezantojmë investimet tona në infrastrukturë – nga Autostrada e Anamoravës deri tek ndërtimi i Digës në Desivojcë. Do të prezantojmë projektet tona në çdo anë të Kosovës, në përfundimin e çdo infrastrukture rrugore në Kosovë, në modernizimin e sistemit shëndetësor, në shkolla gjithëpërfshirëse nga niveli parashkollor, e në pako ekonomike që bizneset kosovare i shndërron në katalizatorë të epokës së re ekonomike të Republikës sonë”, tha ai.

I pari i LDK-së këto komente i bëri nga Gjilani ku u mbajt Konventa Programore e prej ku tha se bashkëbisedimi me qytetarët do të vazhdojë në krejt komunat e Kosovës.

Abdixhiku bëri thirrje që “të gjithë rugovistët, të gjithë besimtarët e djathtë dhe patriotët e Republikës së Kosovës të bashkëngjiten në rrugëtimin e madh”.

“Kosova ka nevojë për Lidhjen Demokratike të Kosovës, e ne kemi nevojë për njerëzit më të mirë të vendit”, deklaroi ai.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat