Hoti: Krizë mbi krizë deri tek rënia e qeverisë

Aktuale

Hoti: Krizë mbi krizë deri tek rënia e qeverisë

Më: 27 shtator 2022 Në ora: 14:44
Avdullah Hoti dhe Albin Kurti

Ish kryeministri i Kosovës, Avdullah Hoti ka reaguar për siç i ka quajtur ai krizën në arsim, në shëndetësi, në politike të jashtme, dhe në ekonomi.

Deputeti i LDK-së ka thënë se në vend që të dialogohet 24 orë deri të gjendet zgjidhja, qeveria bënë luftë më sindikata.

Sa i përket krizës në shëndetësi, ai ka thënë se ministri i Shëndetësisë është non-ekzistent dhe ministër me korrospodencë.

Hoti në një status në Facebook, ka thënë se nuk ka asnjë njohje apo anëtarësim në organizatat ndërkombëtarë.

Ndërsa për dialogun ka thënë se është në udhë pa krye.

Postimi i plotë i Hotit:

Krizë mbi krizë deri tek rënia e qeverisë

Krizë në arsim:

Një muaj nxënësit rrinë në shtëpi. Në vend që të dialogohet 24 orë deri të gjendet zgjidhja, qeveria bënë luftë me sindikata. Shtyhet ligji i pagave pa nevojë, por as nuk plotësohet kërkesa e sindikatave për 100 euro shtesë në muaj, edhe pse e realizueshme në aspektin buxhetor.

Krizë në shëndetësi:

Ministri i Shëndetësisë është non-ekzistent, ai është ministër me korrespondencë. Si rezultat, Kryeministri merr përsipër detyrat e ministrit duke kryesuar vetë një komision qeveritar për shëndetësi.

Krizë në politikën e jashtme:

Asnjë njohje apo anëtarësim për një vit e gjysmë. Shumë ambasada, e në veçanti ato në vendet kryesore mike janë me mungesë të stafit esencial. Grevë e stafit të MPJ-së për shkak të trajtimit joadekuat. Gafa të vazhdueshme të ministres dhe mungesë elementare e njohurive në diplomaci.

Krizë në ekonomi:

Qeveria nuk e ka idenë se si të përballohet inflacioni i lartë dhe kriza energjetike. Nuk ka konsultime me komunitetin e biznesit. Investimet e jashtme më të ulëta se në vitin 2019. Shpenzimet kapitale të qeverisë në nivelin më të ulët që ka qenë ndonjëherë me vetëm 9%. Papunësia mbetet aty ku ka qenë më 2019. Bilanci bankar i Qeverisë arrin në 600 milionë euro, me kosto të mëdha oportune për qytetarët dhe bizneset.

Dialogu në udhë pa krye:

Përveç një togfjalëshi absurd se “njohja duhet të jetë në qendër”, (pse jo në lindje apo perëndim, në të djathë apo në të majtë, në fillim apo në fund?), që përsëritet pa pushim, tjetër parim të dialogut nuk ka. Askush nuk di se çfarë po bisedohet. I kanë sharë marrëveshjet e mëparshme, e tash ato dolën që janë të duhura për të vendosur sovranitetin shtetërorë në tërë territorin. Deklarimet e forta se: nuk ka dialog me Serbinë por me serbët lokal, se nuk ka dialog pa kërkim falje, nuk ka dialog pa zbardhjen e fatit të të pagjeturve e të tjera, u harruan plotësisht. Vendin e tyre e zunë darkat e përbashkëta.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat