Çmimet e biletave të transportit publik janë rritur që nga viti i kaluar, kur është ngritur çmimi i naftës, ndërsa tani, me zbritjen e naftës, nga kompanitë e autobusëve deklaruan se nuk ka diskutim për zbritje të biletave.
Shoferët e autobusëve u shprehën se ulja e çmimit të biletave për udhëtarë mund t’i dërgojë edhe në falimentim për shkak se siç thanë, kalojnë kilometra të shumta rrugore, por kanë edhe shpenzime të tjera që duhet t’i mbulojnë.
Florent Gjoshaj, shofer i autobusit në kompaninë "Armend Tours" deklaroi se nuk mund të vihet në diskutim zbritja e çmimit të biletave.
Ai theksoi se çmimet aktuale të biletave nuk janë të mjaftueshme për shpenzimet e kompanisë së udhëtimit, derisa u shpreh se shteti duhet t’ju ndihmojë.
Gjoshaj: Nuk zë diskutim zbritja e biletave, shteti duhet të na ndihmojë
“Bileta tek ne është rritur 20%, bileta ka qenë 4 euro është bërë 5 euro shpenzimet para 10 viteve deri më sot janë rritur 80% të shpenzimeve tona. Ne në bazë të shpenzimeve i kemi edhe biletat duhet me qenë 7 euro deri 8 euro, ne e kemi rritë vetëm 20% për shkak të kushteve nuk do të bëjmë ballë më i ngritë biletat. Nuk zë diskutim me i zbrit biletat nuk guxon me zbrit edhe nëse çmimi naftës ulet për 80 centë se nuk është në pyetje vetëm nafta, janë rrogat e shoferit, konduktorit, shpenzimet e autobusit. Nuk ka diskutim me zbrit biletën poshtë 5 euro se falimentojmë nuk kemi si me i ble autobusin me mbajtën rrogat e shoferit çka me fitua pronari asgjë hiq. Edhe një herë po e ceki shpenzimet tona janë rritur 80% shteti duhet të na ndihmojë me këto bileta 5 euro për të mbijetuar.”, tha Gjoshaj.
Të njëjtin mendim e ka edhe shoferi Albin Kastrati nga kompania e transportit “Mens”, i cili tha se çmimi i biletave nuk është edhe shumë i mirë për kushtet në të cilat punojnë si transportues.
Ai potencoi se udhëtarët nuk kanë ndonjë ankesë për çmimin e biletave.
Kastrati: Qytetarët nuk kanë ankesa për çmimin e biletave të autobusit
“Kompania “Mens” çmimi i biletave nuk është që është ngritë çmimi i naftës, ne e kemi rritur çmimin para pandemisë edhe e kemi rritur vetëm 50 cent, ka qenë 1.50-2.00 euro tash e kemi bërë 2.00-2.50 euro për studentë. Kushtet që është shtrenjtuar jeta nuk është çmim shumë i mirë për neve si transportues, edhe nafta nuk ka zbritur shumë, është çmimi normal për studentë. Ankesa nga qytetarët nuk kemi pas. Çmimi është i arsyeshëm për qytetarët e Kamenicës", u shpreh Kastrati.
Ndërsa, pensionisti nga Kamenica Faik Matushi tha se çdo qytetar duhet të ketë një kartelë si lehtësim për pagesë, sikur në shtetet evropiane për shkak që çmimi i biletave është i lartë, sidomos për pensionistë, që kanë edhe shpenzime në barna.
Matushi: Pensionistët duhet të lirohen nga pagesat e biletave të udhëtimit
“Pensionistët që jem dikush që nuk ka është problem se 5 euro një biletë tjetra bën 10 euro ka shpenzime shtëpiake dhe barna shumica..... biletat ose duhet me u rritë fondi i pensioneve ose biletat me zbrit me pas një stimulim të pensionistëve një lloj si kartelë për pensionistët me i respektuar. Lehtësim edhe për ata me ndihma sociale që janë në gjendje ekonomike të varfër të i stimuloi si ndihmë. Formë bilete me pas sikur qytetet evropiane si lirim për biletë autobusi.", u shpreh Matushi.
Studentja Nita Ukaj, e cila udhëton nga Vushtria për në Prishtinë u shpreh se biletat nuk janë shumë të shtrenjta. Ajo pati një kërkesë që biletat vetëm të mos shtrenjtohen.
Ukaj: Biletat e autobusit të mos shtrenjtohen
”Udhëtoj nga Vushtrri në Prishtina për mua është udhëtimi shumë lirë nëse ë paguaj 1 euro, nëse e paguaj një biletë sepse udhëtimi është 40 minuta deri 1 orë. Nëse udhëtoj në Gjermani ky udhëtim kushton 10 euro deri 20 euro. Për mua është i lirë që jetoj jashtë Kosovës, por për dikë që është studente këtu është pak e shtrenjtë se do të udhëtojë dhe me u kthye për shtëpi sa i shkon dita larg qytetit të vet. Nuk mundem me e thënë që të lirohen, por vetëm të mos shtrenjtohen”, tha Ukaj.
Kujtojmë që, në muajt e fundit, në Kosovë çmimi i naftës ka shënuar ulje.
