Porositë e Rutte-s, nën vlerësimin e ekspertëve të sigurisë

Aktuale

Porositë e Rutte-s, nën vlerësimin e ekspertëve të sigurisë

Më: 13 mars 2025 Në ora: 13:13
Mark Rutte

Vizita e Mark Rutte-s në Kosovë u shoqërua me takime të shumta zyrtare.

Një delegacion i madh i NATO-s, përfshirë dhe Këshilli i Atlantikut të Veriut, qëndruan në Kosovë për të realizuar bisedime të nivelit të lartë me presidenten Vjosa Osmani, kryeministrin Albin Kurti, FSK-në në krye me komandantin e saj, si dhe ushtarët e KFOR-it.

Rutte, krahas përkrahjes së NATO-s për Kosovën, me shtrirjen e NATO-s në të gjithë territorin e vendit, theksoi gjithashtu edhe disa pika të rëndësishme rreth statusit të FSK-së dhe aspektit të sigurisë në përgjithësi.

Por, si e kanë parë ekspertët e sigurisë këtë vizitë?

Lidhur me qëndrimet e Rutte-s, Jeta Loshaj, nga Qendra Kombëtare për Studime të Sigurisë, tha për IndeksOnline se u përçuan dy mesazhe të rëndësishme.

Sipas saj, Rutte siguroi se, pavarësisht luftës në Ukrainë, Ballkani Perëndimor mbetet një prioritet strategjik për NATO-n. Dhe, së dyti, NATO-ja po vëzhgon nga afër zhvillimet në rajonin tonë dhe është e gatshme të përgjigjet ndaj çdo përpjekjeje që synon destabilizimin.

Duke komentuar vlerësimin e Rutte-s për FSK-në, si “forcë humanitare”, Loshaj thotë:

“Qëndrimi se FSK është forcë humanitare ka të bëjë me faktin se ndryshimet në mandatin e FSK-së në vitin 2018 u bënë me ligj, jo me Kushtetutë siç kërkonte NATO. Mirëpo, kjo mund të interpretohet si qëndrim formal i NATO-s në praktikë. Po ashtu, unë besoj se NATO e kupton që FSK nuk është forcë humanitare, si dhe, është e njoftuar për faktin se Kosova synon të anëtarësohet në NATO me kapacitetet e mbrojtjes plotësisht të konsoliduara. Prandaj, sa i përket deklaratës se FSK-ja është forcë humanitare, nuk besoj që duhet t’i japim jehonë dhe aq shumë pasi kjo nuk ishte deklarata qendrore e vizitës së Sekretarit Rutte, por e gjitha duhet të shihet në kontekstin e rëndësisë së mbajtjes së stabilitetit”.

Për synimet afatgjate të FSK-së në NATO, Loshaj vlerëson se ushtria duhet të përqendrohet në zbatimin e plotë të planit 10-vjeçar të tranzicionit, të rrisë pjesëmarrjen në nismat e NATO-s, si dhe të forcojë besueshmërinë e saj si partner i qëndrueshëm, si për NATO-n, ashtu edhe për KFOR-in.

Kjo, sipas saj, varet jo veëtm nga zhvillimi profesional i FSK-së, por edhe nga qasja dhe retorika politike e qeverisë.

“Fatkeqësisht, kjo vizitë ishte një mundësi e humbur për institucionet e Kosovës që të paraqisnin një qëndrim të përbashkët. Përkundër faktit që ekziston një konsensus i gjerë politik për forcimin e marrëdhënieve me NATO-n, nuk u prezantua ndonjë propozim i përbashkët dhe konkret te Sekretari Rutte, për përparimin e mëtejshëm të këtyre marrëdhënieve”, deklaroi Loshaj.

Takimin me Rutte-n, si vizitë e parë zyrtare e tij në Kosovë pas marrjes së mandatit, presidentja Vjosa Osmani e vlerësoi si një mundësi të mirë për të riafirmuar partneritetin me Aleancën më të fuqishme të sigurisë në botë.

comment Për komente lëvizni më poshtë
Sot mund të lexoni Shfletoni kopertinat