Ministri në detyrë i Bujqësisë, Faton Peci është liruar në procedurë të rregullt pas intervistimit disa orësh nga Prokuroria Speciale. Peci është intervistuar në cilësinë e të dyshuarit, në rastin e tenderit për fabrikën e mbetjeve nën shtazore.
Lajmin për KosovaPress e ka konfirmuar Arbnora Luta, nga Prokuroria Speciale.
“Ka përfunduar intervistimi. Është liruar në procedurë të rregullt”, ka thënë Luta për KosovaPress.
Ajo ka thënë se ka përfunduar intervistimi edhe i kryeshefit të Agjencisë së Ushqimit dhe Veterinarisë, Bekim Hoxha.
Ministri në detyrë i Bujqësisë, Faton Peci, është intervistuar nga organet e hetuesisë, pas bastisjes që ndodhi në katër institucione vartëse të kësaj ministrie.
Ai është intervistuar lidhur me dyshimet për çështjen e tenderit për funksionalizimin e fabrikës për mbetje shtazore.
Ndërkohë, bastisjet janë zhvilluar në katër lokacione në Ministri të Bujqësisë, Agjencinë për Zhvillimin e Bujqësisë, Agjencinë e Ushqimit dhe Veterinarisë dhe kompania përfituese e kontratës.