Ushtrimi i përbashkët i planifikuar nga Policia e Kosovës dhe Ambasada e Shteteve të Bashkuara në Prishtinë ka përfunduar, raporton kp.
Lajmi u bë i ditur nga Ambasada e SHBA-së në Prishtinë përmes një statusi të shkurtër në rrjetet sociale.
“Ushtrimi i përbashkët për reagim ndaj krizave i kryer nga Ambasada e SHBA-së në Prishtinë dhe Policia e Kosovës tani ka përfunduar. Faleminderit!”
Pjesë e ushtrimit ishin njësitë policore, duke filluar nga njësitë patrulluese të rendit publik, njësitë e reagimit të shpejtë e deri te njësitë elite speciale të profileve të ndryshme. Ushtrimi ka nisur në ora 15:00 dhe ka zgjatur deri në orën 21:00, në zonën përreth Ambasadës amerikane në Prishtinë – lagjja “Arbëria”.
Ushtrimet e përbashkëta të Policisë së Kosovës dhe Ambasadës amerikane, janë një tregues i forcimit të mëtejmë të bashkëpunimit në siguri dhe për të siguruar gatishmërinë në menaxhimin dhe reagimin ndaj situatave emergjentë, dhe të çfarëdo incidenti të mundshëm në Kosovë.
