Përfundon numërimi i votave: VV fituese e padiskutueshme – ja si do të duket legjislatura e re

Aktuale

Përfundon numërimi i votave: VV fituese e padiskutueshme – ja si do të duket legjislatura e re

Më: 28 dhjetor 2025 Në ora: 08:13 Përditësuar në ora: 16:33 më 28.12.2025
Kuvendi i Kosovës

​Moslejimi i asistencës në votim përfundon me shqyerje fletëvotimi

Një incident është shënuar sot rreth orës 12:00 në qendrën e votimit të vendosur në shkollën “Mustafa Bakija” në Prizren.

Zëdhënësi i Policisë për rajonin e Prizrenit, Shaqir Bytyqi ka njoftuar për KosovaPress, se një qytetar i moshuar, në shenjë revolte pasi komisioni zgjedhor nuk e ka lejuar ta ndihmojë bashkëshorten e tij gjatë procesit të votimit, e ka shqyer fletëvotimin.

Pas incidentit, Policia e Kosovës ka ndërhyrë menjëherë dhe e ka shoqëruar qytetarin në stacion policor për intervistim. Lidhur me rastin është njoftuar edhe prokurori i shtetit, me të cilin janë konsultuar veprimet e mëtejme ligjore.

Me vendim të prokurorit, pas përfundimit të procedurave fillestare, personi është liruar, ndërsa rasti do të trajtohet në përputhje me legjislacionin në fuqi.

Radoniqi për problemet me energjinë: Do të ruajmë integritetin e votës

Të tjera probleme me energjinë elektrike ka bërë të ditura kryesuesi i KQZ-së, Kreshnik Radoniqi në disa komuna të tjera, por që tha se problemet u evituan shpejt.

“Sipas raportit të orës 15:00 në Dhomën Operative të KQZ-së, janë raportuar disa probleme të tjera me mungesë të energjisë elektrike në tri Qendra Votimi në komunën e Skenderajt, 2 në komunën e Malishevës dhe dy të tjera në Novobërd e Obiliq, për të gjitha këto raste është njoftuar KEDS-i për të ndërmarrë hapa të nevojshme për rikthimin e energjisë elektrike dhe sipas informacioneve, kjo ka ndodhur brenda një kohe shumë të shpejt”.

Radoniqi tha se shpreson që nuk do të ketë ndërprerje të energjisë elektrike kur fillion të bie terri.

I pyetur çka ndodhë në një Qendër Votimi kur ndërpritet energjia elektrike, ai tha se procesi vazhdon. “Procesi i votimit nuk do të ndërpritet, ne do të sigurohemi që nuk do t’i lëmë në terr të votojnë, por procesi i votimit nuk mund të ndërpritet”, tha Radoniqi.

Ai tha se i shqetëson çdo veprim që mund të cenojë procesin, porse tha se do të punojnë që integriteti i votës të mos cenohet.

Radoniqi tha se bazuar në të dhënat preliminare që kanë marrë nga rreth 96 për qind e vendvotimeve, numri i qytetarëve me të drejtë vote që kanë votuar deri në orën 15: 00 tha se është 572 mijë e 726 votues, apo 28,65 për qind.

Krahasuar me të njëjtën orë me zgjedhjet e shkurtit, kishin votuar 28,82 për qind.

Kryetarja e Ranillugut intervistohet nën dyshimin se ushtroi ndikim te votuesit për të votuar sipas udhëzimeve të saj

Kryetarja e Komunës së Ranillugut, Tanja Antiq, është intervistuar nën dyshimin se ushtroi ndikim te votuesit për votim sipas udhëzimeve të saj.

Kështu konfirmoi për “Betimi për Drejtësi“, Ismet Hashani, zëdhënës i Policisë për rajonin e Gjilanit.

“Me datën 28.12.2025, përmes rrugëve operative kemi pranuar informacion se anëtarja e kryesisë së forumit të gruas nga partia Lista Serbe dhe aktualisht Kryetare e Komunës së Ranillugut, dyshohet se përmes anëtarëve të Komisionit Komunal zgjedhor të kësaj partie në komunën e Ranillugut ka ushtruar ndikim tek votuesit e pa përcaktuar ose votuesit e subjekteve të tjera. Të njëjtit dyshohet se janë kanosur për ndërprerje të benifiteve të cilat këta qytetar i përfitojnë nga shteti i Serbisë, në rast të mos votimit sipas udhëzimeve”, tha Hashani.

E dyshuara është intervistuar dhe ndaj saj është iniciuar rasti “Cenimi i fshehtësisë së votimit”.

“E dyshuara është shoqëruar në ambientet e hetimeve rajonale dhe intervistuar në prezencën e avokatit me qëllimi të verifikimit të informacioneve dhe sqarimit të rrethanave. Pas intervistimit me vendim të Prokurorit të Shtetit është liruar, ndërsa rasti “Cenim i fshehtësisë së votimit” do vazhdoj të hetohet nga Njësiti i Hetimeve Rajonale në Gjilan në koordinim të plotë me Prokurorinë Themelore”, tha Hashani.

KQZ ka përditësuar të dhënat deri në ora 15:00

Nga: A.Sh

KQZ ka përditësuar të dhënat deri në ora 15:00.

Sipas KQZ-së, numri i qytetarëve me të drejtë vote që kanë votuar deri në ora 15:00 është 546 mijë e 145 votues apo 27,32%  nga 1 milionë e 999 mijë e 204 votues.

Më pak se pesë orë deri në mbylljen e vendvotimeve

Procesi i votimit në zgjedhjet e parakohshme parlamentare në vend po vazhdon pa parregullsi të mëdha të raportuara.

Mbarëvajtja e procesit po monitorohet nga Policia e Kosovës, Prokuroria, si dhe vëzhgues vendorë e ndërkombëtarë.

Sipas të dhënave të Komisionit Qendror të Zgjedhjeve, deri në orën 14:20 kanë votuar 18.49% e qytetarëve me të drejtë vote.

Qendrat e votimit do të qëndrojnë të hapura deri në orën 19:00.

Ndërkaq, transmetimi i rezultateve preliminare të së dielës do të nis para orës 20:00.

Zgjedhjet parlamentare, kaq qytetarë kanë votuar deri në orën 13:00 në Obiliq

Në shkollën “Ibrahim Rugova”, në komunën e Obiliqit deri në ora 13:00 sipas të dhënave zyrtare kanë votuar mbi 1 mijë e 700 votues nga 8 mijë e 600 votues, më shumë se në zgjedhjet e kaluara të 9 shkurtit. Sipas zyrtarëve të KQZ-së në këtë shkollë, procesi zgjedhor deri më tani në këtë qendër votimi ka shkuar në rregull.

Në këtë qendër votimi janë 10 vendvotime të rregullta.

Ne total në Komunën e Obiliqit në listën e votuesve të drejtë vote kanë mbi 25 mijë e 580 votues, ndërkohë sipas të dhënave të Komisionit Qendror Zgjedhor deri në orën 13:00 kanë votuar vetëm 5 mijë e 100 qytetarë, raporton KosovaPress.

Sipas të dhënave nga Lista Votuese, numri i qytetarëve me të drejtë vote në vendvotime, në Republikën e Kosovës është 1,999,204 votues, ndërkaq numri i qytetarëve që janë regjistruar për të votuar jashtë Kosovës është 77,086 votues.

Kjo listë përmban 7,192 votues më shumë se në Zgjedhjet Lokale të cilat u mbajtën më 12 tetor 2025.

​Numër i vogël i qytetarëve votuan deri në mesditë në Zveçan

Në Komunën e Zveçanit pjesëmarrja e qytetarëve në votim deri në këto momente mbetet e ulët.

Në qendrën e votimit me kushtë, sipas menaxheres së qendrës, Egzona Kelmendi, të drejtën e votës deri më tani e kanë shfrytëzuar vetëm 10 qytetarë.

“Numri i përgjithshëm i votuesve në këtë qendër është 200. Deri më tani kanë votuar vetëm 10 qytetarë. Nuk kemi pasur ankesa apo parregullsi,” ka deklaruar ajo.

Sipas përditësimit të fundit të të dhënave zyrtare nga Komisioni Qendror i Zgjedhjeve, në komunën e Zveçanit kanë votuar gjithsej 12.52 për qind e votuesve, apo 860 qytetarë, nga 6 mijë e 871 sa kanë të drejtë vote në këtë komunë.

Shabani: Votimi në Kosovë po zhvillohet i qetë me dinjitet dhe kulturë qytetare

Qytetarët e Kosovës po i drejtohen sot kutive të votimit për zgjedhjet e parakohshme parlamentare të 28 dhjetorit të cilat erdhën pas dështimit për disa muaj të legjislativit për të krijuar Qeverinë e vendit.

Votimi po zhvillohet në qytetet e Kosovës me qetësi dhe respekt, ndërsa vëzhguesit ndjekin procesin në zonat kryesore dhe raportojnë tolerancë dhe kulturë qytetare

Ambasadori i Paqes, Tahir Shabani prezanton itinerarin e vëzhgimit në qytete të ndryshme të Kosovës, thekson angazhimin e vëzhguesve vendor dhe vlerëson votimin e qetë, me dinjitet dhe tolerancë të shqiptarëve

Shabani: Votimi në Kosovë po zhvillohet i qetë, me dinjitet dhe kulturë qytetare

“Shqiptarët po votojnë me dinjitet, me qetësi dhe me kulturë,ky është mesazhi i tolerancës, mirësisë dhe solidaritetit,vëzhguesit i kemi përqendruar në zonat e ndryshme të Kosovës, duke filluar nga Gjilani, Kamenica, Ferizaj, Viti, Prishtina dhe zona e Rrafshit të Kosovës, Gollaku dhe Llapi. Pastaj do të zbresim për në Mitrovicë, nga këtu në Skenderaj, Pejë, ndërsa për çështjet e pjesës së sekondarit do të na ndihmojnë edhe vëzhguesit vendorë. Do të kalojmë nga Peja andej, Istogu, Deçani dhe do t’i kthehemi Klinës. Aty ku ka tolerancë, ka qytetërim dhe civilizim të shqiptarëve”,theksoi Shabani.

Deri në ora 13:00 sipas të dhënave të KQZ-së kanë votuar 356 mijë e 645 qytetarë nga 1 milionë e 999 mijë e 204 me të drejtë vote apo 17.84%.

Këto janë komunat ku dalja e qytetarëve në zgjedhje është më e madhe

Prishtina, Gjilani, Shtimja, Podujeva, Mitrovica e Veriut dhe Zveçani janë komunat ku qytetarët kanë dalë më shumë për të votuar deri në orën 13:00, sipas të dhënave të Komisionit Qendror të Zgjedhjeve.

Në komunën e Prishtinës, deri në këtë periudhë kanë dalë të votojnë 10.90 për qind, apo 23 mijë e 935 votues nga gjithsej 219 mijë qytetarë me të drejtë vote. Pasohet nga komuna e Shtimes me 10.12 për qind, apo 2 mijë e 812 votues nga gjithsej mbi 27 mijë qytetarë me të drejtë vote; Gjilani me 9.37 për qind, apo 9 mijë e 831 votues nga gjithsej 104 mijë e 807 qytetarë me të drejtë vote; dhe Podujeva me 9.30 për qind, apo 7 mijë e 845 votues nga gjithsej 84 mijë qytetarë me të drejtë vote.

Dy komunat e tjera me përqindje të mëdha të daljes në votim janë komuna e Novobërdës me 14.50 për qind, apo 1 mijë e 455 votues nga gjithsej 10 mijë e 37 qytetarë me të drejtë vote; komuna e Mitrovicës së Veriut me 14.58 për qind, apo 2 mijë e 556 votues nga gjithsej mbi 17 mijë qytetarë me të drejtë vote; dhe komuna e Zveçanit me 12.52 për qind, apo 860 votues nga gjithsej 6 mijë e 871 qytetarë me të drejtë vote.

Ndërkaq, në dy komunat e tjera me shumicë serbe ka dalje më të ulët në zgjedhje: Zubin Potoku 1.15 për qind dhe Leposaviqi 2.03 për qind.

Në anën tjetër, sipas të dhënave të KQZ-së, në komunën e Istogut dhe Dragashit deri në orën 13:00 ka dalje më të ulët të qytetarëve në zgjedhje, përkatësisht në Istog 6.91 për qind dhe Dragash 3.99 për qind.

Deri në ora 13:00 kanë votuar 17,26% për qind e votuesve

Nga: A.Sh

KQZ ka përditësuar të dhënat deri në ora 13:00.

Sipas KQZ-së, numri i qytetarëve me të drejtë vote që kanë votuar deri në ora 13:00 është 345 mijë e 101 votues apo 17,26% nga 1 milionë e 999 mijë e 204 votues.

comment Për komente lëvizni më poshtë
Sot mund të lexoni Shfletoni kopertinat