​E akuzuara për spiunazh edhe sot deklarohet e pafajshme

Aktuale

​E akuzuara për spiunazh edhe sot deklarohet e pafajshme

Më: 3 prill 2026 Në ora: 10:55
Foto ilustrim

Në Gjykatën Themelore të Prishtinës ka nisur shqyrtimi gjyqësor ndaj të akuzuarës për spiunazh, Jelena Gjukanoviq. Edhe sot ajo para trupit gjykues u deklarua e pafajshme për veprën penale me të cilën ngarkohet.

Shtetasja serbe dhe ish-punonjëse e Organizatës për Siguri dhe Bashkëpunim në Evropë (OSBE) tha se nuk ndihet fajtore për veprën me të cilën e akuzohet nga Prokuroria Speciale.

Gjukanoviq: Nuk ndihem fajtore

“Nuk ndihem fajtore”, tha ajo.

E akuzuara, Jelena Gjukanoviq dhe avokati i saj, Predrag Miljkoviq hoqën dorë nga e drejta për tu lexuar aktakuza pasi ajo ishte lexuar në seancën e shqyrtimit fillestar.

Miljkoviq: U lexua njëherë, nuk kemi nevojë

“Nuk kemi nevojë, njëherë e kemi lexuar”, tha ai.

Aktualisht shqyrtimi gjyqësor po vazhdon me fjalët hyrëse të të gjitha palëve.

Gjukanoviq, shtetase serbe dhe ish-punonjëse e Organizatës për Siguri dhe Bashkëpunim në Evropë (OSBE) dyshohet se ka qenë e përfshirë në aktivitete spiunazhi në bashkëpunim me një person tjetër, i cili gjithashtu është nën hetim nga autoritetet.

Ekzistojnë dyshime se ajo ka bashkëpunuar me Agjencinë Serbe të Sigurisë dhe Inteligjencës (BIA).

E akuzuara për spiunazh, Jelena Gjukanoviq edhe në seancën e shtatorit të vitit të kaluar nuk e kishte pranuar fajësinë në gjykimin fillestar i cili ishte mbajtur në Gjykatën Themelore në Prishtinë.

Gjukanoviq ishte arrestuar më 28 shkurt 2025 në pikën kufitare në Jarinje, dhe që atëherë ndodhet në paraburgim. 

comment Për komente lëvizni më poshtë
Sot mund të lexoni Shfletoni kopertinat