Peja shënoi fitore shumë të vlefshme ndaj Prizrenit 16 me rezultat 72:84 (23:32, 10:20, 21:12, 18:20), në xhiron e 12-të të Ligës Unike, takim që u regjistrua edhe për elitën e basketbollit të Kosovës.
Fillimi i ndeshjes ishte i barabartë, e më pas pejanët ishin më të mirë për një nuancë, duke qenë në epërsi dhe çerekun e parë e përfunduan me rezultat 23:32. Pejanët vazhduan me lojë të mirë edhe në periudhën e dytë, duke thelluar më shumë epërsinë, ndërsa prizrenasit assesi të këndellen. Skuadra nga Peja ngriti epërsinë deri në 19 pikë, 33:52, sa përfundoi pjesa e parë e takimit.
Verdhezinjtë vazhduan me lojë të mirë në periodën e tretë, ku rritën epërsinë në 23 pikë, 39:62, megjithatë, më pas skuadra nga Prizreni hyri në një seri fantastike, duke afruar rezultatin në dhjetë pikë, 54:64, sa ishte rezultati në semafor pas 30 minutash lojë. Në dhjetë minutat e fundit, u zhvillua lojë kryesisht e barabartë, por Peja ruajti epërsinë e krijuar, duke triumfuar në fund me shifrat 72:84.
Te Prizreni 16 më i miri ishte Darell Davis me 31 pikë e 13 kërcime, kurse te Peja u dalluan Daniel Lekndreaj me 22 pikë e 16 kërcime, Arian Qallakaj me 18 pikë, tetë kërcime dhe dhjetë asistime, Courtney Fells me 15 pikë e gjashtë kërcime dhe Dardan Berisha me 21 pikë e tetë kërcime.
Prizreni 16 ka shtatë fitore e pesë humbje, kurse Peja ka nëntë fitore e tri humbje.
