Janë luajtur ndeshjet e javës së 21-të dhe të fundit të sezonit të rregullt të kampionatit të Kategorisë së Parë në basketboll për femra. Flamurtari kampion e mbylli kampionatin në vendin e parë dhe do të ketë në favor faktorin fushë në fazën play off.
Vlonjatet fituan në fushën e tyre sot me vështirësi 63-61 ndaj Partizanit, në një ndeshje ku loja e skuadrave ishte me luhatje. Si zakonisht, basketbollistja amerikane Laura Johnson, ishte më e mira për Flamurtarin, me 27 pikë e 20 rebound.
Fiton edhe Vllaznia, që në fushën e saj mundi 80-57 Tirana Barleti Basket, në një takim të komanduar nga vendaset. Dashja me 24 pikë e 18 rebound shkëlqeu për shkodranet, ndërkohë që TBB në këtë ndeshje u paraqit vetëm me 5 basketbolliste, që luajtën përgjatë gjithë 40 minutave.
Studenti siguron vendin e katërt pas fitores 89-51 që arriti ndaj Elbasanit, ndeshje e luajtur në kryeqytet. Takimi u komandua nga basketbollistet vendase, që patën epërsi në parket. Më e mira në parket ishte Marina Pëllumbi me 27 pikë.
Basketboll-Femra, Kategoria e Parë (java e 21-të)
Studenti – Elbasani, 89-51
Flamurtari – Partizani, 63-61
Vllaznia – Tirana Barleti Basket, 80-57
Tirana (pushim)
Renditja: Flamurtari 37 pikë, Partizani 33 pikë, Tirana 33 pikë, Studenti 31 pikë, Vllaznia 28 pikë, Tirana Barleti Basket 24 pikë, Elbasani 21 pikë, Apolonia 14 pikë*.
*Apolonia u tërhoq nga kampionati pas fazës së dytë.
