Premtohet super spektakël për Superkupë

Basketboll

Premtohet super spektakël për Superkupë

Më: 23 nëntor 2022 Në ora: 20:46
Premtohet super spektakël për Superkupë

Nga 7 deri më 11 dhjetor, e gjithë vëmendja e basketbollit do të jetë në Prishtinë.

Super spektakël është premtuar për Superkupën e Kosovës në basketboll. Sot (e mërkurë) është nënshkruar marrëveshja ndërmjet Federatës së Basketbollit të Kosovës (FBK) dhe Klubit të Sigal Prishtinës për organizimin e Superkupës.

Kryetari i FBK-së, Arben Fetahu është shprehur se janë të gatshëm për të organizuar edhe një ngjarje madhore në basketbollin e Kosovës. “Është një prej aktiviteteve kryesore që organizon Federata e Basketbollit e Kosovës.

Kjo garë prestigjioze kësaj radhe do të organizohet në Prishtinë nga klubi i Sigal Prishtinës në bashkëpunim me stafin e FBK-së, ku besoj se organizimi do të jetë shumë i mirë. Shpresoj, por edhe besoj se do të kemi spektakël sportiv dhe të basketbollit në Prishtinë dhe ajo që e veçon këtë aktivitet është se lejohen edhe shikuesit mysafirë.

Pra, palestra në Prishtinë do të jetë e mbushur me tifozë nga e gjithë Kosova dhe normalisht se jemi të lumtur. Synimi është të krijohet një kulturë, kulturë e sportit dhe për të gjithë komunitetin”, është shprehur Fetahu në konferencën për media.

Ndërkohë, kryetari i KB Sigal Prishtinës, Blerand Stavileci, ka premtuar spektakël për Superkupë, ndërsa bardhekaltrit veçohen për organizime. “Fillimisht jam shumë i lumtur që basketbolli po ka shikueshmëri në të gjitha palestrat në Kosovë dhe po ka një super organizim në të gjitha vendet. Kjo është meritë e klubeve dhe Federatës së Basketbollit të Kosovës, dhe të gjithë të punësuarve në FBK.

Është krijuar një kulturë, një kulturë që po i tejkalon kufijtë e sportit dhe normalisht për këtë jemi shumë të lumtur.

Interesimi është rritur për basketboll dhe kjo dëshmon për punën e mirë që po bëhet në Federatë dhe në klube. Sa i  përket organizimit, besoj se do të jetë diçka me të cilin do të krenohet e gjithë Kosova. Do të jetë argëtim, spektakël dhe festë, por edhe spektakël i paparë deri më tani”, theksoi Stavileci.

Në këtë garë do të marrin pjesë të gjitha klubet e elitës, ku priten sfida interesante.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat