Tepihu i Kuq në prag të natës finale të edicionit të tretë të Festivalit të Këngës në RTK u shndërrua në një skenë emocionesh dhe elegance, ku parakaluan personalitetet e njohura të artit, muzikës dhe kulturës e jetës publike.
Përparim Rama, kryetar i Komunës së Prishtinës dhe një nga figurat që ka mbështetur këtë festival përgëzoi RTK-në dhe stafin për organizimin e këtij eventi: “Urime për këtë edicion të mrekullueshëm! Kemi punuar shumë së bashku me RTK-në dhe rezultatet janë të dukshme, një transformim monumental. Organizimi i jashtëzakonshëm i festivalit u jep zë artistëve tanë të talentuar. Çmimi i kryeqytetit është një surprizë e bukur për sonte dhe edhe pse zgjedhja ka qenë sfiduese, procesi ka qenë fantastik”, tha Rama. Ai theksoi gjithashtu rëndësinë e bashkëpunimit në të gjitha nivelet dhe tha se Kosova ka talente të jashtëzakonshëm që duhet të mbështeten për të ecur përpara.
Shkurte Fejza, ikonë e muzikës shqiptare, u shpreh me emocion për festivalin: “Është kënaqësi për mua që jam sonte me ju, për të parë një festival që Kosova e admiron dhe jemi shumë të lumtur që mbajtja e festivaleve është gjithmonë në të mirë të muzikës dhe kulturës sonë. Mbajtja e festivaleve për artistin është diçka shumë e bukur, sepse vijnë artistë të rinj, të cilët Kosova fatmirësisht ka shumë. E kam përcjell këtë festival dhe vit pas viti është në nivel tjetër”.
Këngëtarja e mirënjohur Adelina Ismaili po ashtu u shpreh plot emocione që sonte është pjesë e natës finale: “Kam filluar karrierën time si 6-vjeçare në ‘Akordet e Kosovës’ dhe për mua është emocion i veçantë të jem këtu. . E kam përcjellë festivalin dhe më kanë pëlqyer shumë këngët. Mendoj se është kulminacioni i festivalit sonte. Në krahasim me dy edicionet e kaluara ky edicion mu ka dukur si kulm i gjithë asaj që ka ndodhur, por ende e kemi foshnje festivalin tonë dhe mezi pres sonte në finale të shoh se çfarë do të ndodhë. Janë emocione të veçanta”, tha ajo.
Nikollë Nikprelaj po ashtu përgëzoi RTK-në për organizimin e shkëlqyeshëm dhe tha se ky është momenti më i madh dhe më i bukur për të.
“Për mua kjo është ngjarja më e madhe dhe më e bukur. Ky festival na bën më të vërtetë krenarë. Bravo RTK-së, bravo drejtuesit të festivalit Florent Boshnjaku dhe një bravo e madhe për gjithë stafin. Mezi e kemi pritur këtë festë, por unë si këngëtar me eksperiencë dhe në moshë i ftoj autoritetet dhe ata që kanë mundësi që të krijojnë dhe të vazhdojnë Akordet e Kosovës, që të ketë një festival edhe për këngë popullore pse jo. Sidoqoftë është një start jashtëzakonisht i nivelit të lartë ky festival, edhe pse është shumë i ri”, tha ai.
Në mesin e mysafirëve të shumtë në Tepihun e Kuq parakaloi edhe Ismet Krasniqi, president i Komitetit Olimpik të Kosovës, i cili vuri në pah lidhjen mes sportit dhe artit: “Sporti, kultura dhe muzika janë një familje. Jam i lumtur që Kosova ka talente që njihet në mbarë botën. Kur udhëtoj në shumë vende të botës më rastis të dëgjoj muzikë shqipe në restorante e vende të ndryshme. Kosova e meriton vendin në Eurovision dhe shpresoj që të tregojmë talentin tonë së shpejti në të gjithë Evropën”, tha ai.
