Saranda Bogujevci mirëpret ekipin e filmit “Dua” pas suksesit në Festivalin e Filmit në Kanë

Kultura

Saranda Bogujevci mirëpret ekipin e filmit “Dua” pas suksesit në Festivalin e Filmit në Kanë

Më: 26 maj 2026 Në ora: 16:13
Foto nga takimi

Ministrja në detyrë e Kulturës dhe Turizmit, Saranda Bogujevci, ka mirëpritur ditën e sotme (e martë) ekipin e filmit “Dua”, pas suksesit në Festivalin e Filmit në Kanë.

Siç thekson në postimin e shpërndarë në Facebook, Bogujevci ka përgëzuar regjisoren Blerta Basholli për arritjen e madhe për kinematografinë e Kosovës.

Ajo tutje shton se është krenare për sukseset që aktorët shqiptarë tashmë kanë arritur në festivalet e famshme botërore.

Postimi i plotë i Bogujevcit (pa ndërhyrje):

“Me shumë kënaqësi prita sot në kabinet ekipin e filmit “Dua”, pas suksesit të jashtëzakonshëm në Festivalin e Kanës, ku filmi u nderua me çmimin “SACD” në kuadër të “Semaine de la Critique”.

I përgëzova regjisoren Blerta Basholli dhe gjithë ekipin për këtë arritje të rëndësishme për kinemanë tonë.

Ky vlerësim, i ndarë nga Shoqata e Autorëve dhe Kompozitorëve Dramaturgjikë në Francë, dëshmon edhe një herë fuqinë krijuese dhe nivelin artistik që po arrijnë filmbërësit tanë në botë.

“Dua” është sukses i merituar që na bën krenarë të gjithëve dhe një tjetër dëshmi se kinemaja jonë po vazhdon të zërë vend të rëndësishëm në festivalet më prestigjioze të botës”. 

comment Për komente lëvizni më poshtë
Sot mund të lexoni Shfletoni kopertinat