Në prag të vizitës zyrtare në Berlin, ministri i jashtëm i Serbisë Nikola Selakoviç, paralajmëroi shfrytëzimin e rastit për të njoftuar homologun gjerman me atë që ka arritur Serbia, gjë që do ishte e pamenduar pa mbështetjen gjermane, për gatishmërinë e vazhdimit të bashkëpunimit dhe dialogut politik me Berlinin, shkruajnë mediat serbe, përcjell “Bota Sot”.
Selakoviç në intervistën për gazetën e njohur gjermane “Zudojçe Cajtung”, nënvizoi se mbështetja e Gjermanisë është shumë e rëndësishme për Serbinë, posaçërisht në procesin e bashkëngjitjes në BE.
Lidhur me normalizimin e raporteve me Kosovën, Selakoviç potencoi se Beogradi ka ndërmarrë disa hapa në atë drejtim, duke përmbushur obligimet nga marrëveshja e Brukselit e vitit 2013 dhe vazhdon të pres që edhe Prishtina të përmbush obligimin e saj lidhur me Asociacionin e komunave serbe.
“Ne mbështesim rolin e të dërguarit evropian të BE-së Lajçak. Sinqerisht, besojmë se zgjidhja e vetme e kësaj çështje është kompromisi. Ndërsa kompromisi i qëndrueshëm nuk mund të përbëhet në atë që njëra palë të fitojë gjithçka, e tjetra asgjë”, ka thënë Selakoviç.
Në pyetjen e gazetarit gjerman nëse një kompromis i tillë përfshinë pranimin e Kosovës si shtet sovran, Selakoviç iu përgjigj me pyetjen “çka është atëherë kompromisi?”
“Unë nuk shoh kompromis në një kuadër të tillë. E di që Berlini e konsideron Kosovën si shtet sovran. Por Beogradi nuk e ka një vështrim të tillë, sikur as Madridi, Athina, Bratisllava, Nikozia dhe Bukureshti. Duhet të gjejmë zgjidhje që është e qëndrueshme dhe e pranueshme”, ka thënë shefi i diplomacisë serbe.
