Kuvendi Komunal i Podujevës ka pezulluar përkohësisht rregulloren e 31 janarit të vitit 2020, përmes së cilës bizneseve të kësaj komune nuk u lejohej të punonin të dielave.
Në vendimin e publikuar në faqen zyrtare të kësaj komune në “Facebook” thuhet se arsyeja e pezullimit të kësaj rregulloreje vjen si pasojë e dëmtimit të bizneseve gjatë pandemisë, duke synuar ringjalljen e tyre në këtë kohë kur në Kosovë vijnë bashkatdhetarët.
“Arsyeja e pezullimit të neneve të cekura, përkatësisht lejimi i punës edhe ditëve të diela për subjektet afariste/bizneset që operojnë në territorin e Komunës së Podujevës, është ofrimi i mundësive për afarizëm dhe qarkullim të bizneseve me qëllim të ngritjes së tyre si pasojë e dëmeve të shkaktuara nga pandemia COVID-19, furnizim dhe shërbime të rregullta për qytetarët në këtë periudhë verore kur pritet edhe ardhja e një numri të madh të bashkatdhetarëve për pushime në Kosovë”, thekson KK i Podujevës.
Bëhet e ditur se ky vendim i ri do të jetë i përkohshëm dhe do të mbetet në fuqi deri më 30 shtator të këtij viti.
Vendimi i ri thuhet se hyn në fuqi 7 ditë pas publikimit të tij në uebfaqen zyrtare të Komunës së Podujevës.
