Misioni i OSBE-së në Kosovë sot gjatë ditës njoftoi se nuk mund të organizojë procesin e mbledhjes së votave për referendumin e Serbisë. Ajo që ra në sy në deklaratë ishte përmendja e emrit “Kosovë dhe Metohi” duke iu referuar kështu të ashtuquajturës Zyrë e Qeverisë së Serbisë për Kosovën.
“Ambasadori Davenport e përsëriti këtë mesazh në një letër dërguar Zyrës së Qeverisë së Serbisë për Kosovë dhe Metohi më 14 janar dhe ambasadori e ritheksoi qëndrimin në një bisedë telefonike me Petar Petkoviq mëngjesin e sotëm të 15 janarit”, thuhet në deklaratë.
Kur i referohen të ashtuquajturës Zyrë për Kosovë, misioni i OSBE-së nuk ka përdorur fare thonjëza.
Ndryshe, Kuvendi i Kosovës sot ka miratuar rezolutë me të cilën ndalohet referendumi i Serbisë për ndryshime kushtetuese edhe në territorin e Kosovës.
