OJQ “Voice of roma ashkali and egyptians” ka reaguar pasi 10 fëmijë nga radhët e komuniteteve rom, ashkali dhe egjiptian nga komuna e Pejës në ‘Festën e Shkronjave të Abetares’, ishin ndarë në sallën ku po mbahej manifestimi.
Në reagim thuhet se një gjë e tillë është diskriminuese dhe cenon të drejtën e këtyre fëmijëve që festonin bashkë me fëmijët e tjerë dhe kërkon të merren masa adekuate, pasi rasti ka ndodhur në praninë e përfaqësuesve të institucioneve qendrore e lokale.
“Veprimet nga MASHTI dhe Drejtoria Komunale e Arsimit në Pejë, duhen të jenë urgjente dhe efikase në marrjen e masave adekuate ndaj rasteve të tilla që kanë ndikim negativ te këto komunitete dhe shoqëria në përgjithësi”, thuhet në reagim.
OJQ “Voice of Roma, Ashkali and Egyptians” dënon ashpër veprimet e tilla përjashtuese dhe diskriminuese të pjesëtarëve të komuniteteve rom, ashkali dhe egjiptian dhe kërkon që ky rast të trajtohet në bazë të Ligjit për Mbrojtje nga Diskriminimi.
“Është shumë e rëndësishme që përveç se të reagojmë në një ditë si kjo dhe ditët e tjera të kalohen në heshtje, në fakt çdo ditë do të duhej që institucionet e Kosovës të punojnë fuqishëm në parandalimin e rasteve të tilla segreguese dhe të punojnë në aspektin e ndërgjegjësimit të shoqërisë sonë. Andaj kërkojmë përgjegjësi institucionale dhe marrjen e masave adekuate për rastin në fjalë”, përfundon reagimi.
