Dy festa për një ditëlindje, dega e PD Kukës feston në dy kampe të ndara

Shqipëria

Dy festa për një ditëlindje, dega e PD Kukës feston në dy kampe të ndara

Më: 5 janar 2022 Në ora: 16:43
Bujar Nishani

31 vjetori i themelimit të Partisë Demokratike dega Kukës, e gjeti këtë forcë politike të përçarë. Përplasjet në qendër, dukshëm janë shpërndarë edhe në rrethe, ndërsa nga njëra anë Bujar nishani ftoi demokratët në protestën e së shtunës kundër Lulzim Bashës, ndërsa deputeti Flamur Hoxha mohoi përçarjen në parti.

Me dy gishtat lart, simbolin e lirisë, dhe me thirrjet “Luli Ik” ish-presidenti Bujar Nishani u prit nga një pjesë e demokratëve në Kukës në 31 vjetorin e themelimit të degës së kësaj partie në këtë qytet.

I rreshtuar krah Sali Berishës, Nishani deklaroi qartazi se nuk ka asnjë hap pas.

Kur na ndajnë vetëm pak ditë nga protesta e së Shtunës të thirrur nga Grupi i Rithemelimit, Nishani i ftoi demokratët e Kukësit që të jenë në Tiranë për atë që ai e quan rikthim i selisë.

Pak metra më larg Pallatit të Kulturës ku ish-presidenti po mbante takimin e tij, deputeti Flamur Hoxha dhe të tjerë mbështetës të Partisë Demokratike dhe Lulzim Bashës ishin mbledhur në një takim më formal.

Edhe pse kriza është e dukshme në kampin demokrat, Hoxha nuk pranoi të konfirmojë përçarjen në partinë së cilës i përket.

Edhe dega lokale në Kukës e Partisë Demokratike është e pozicionuar në dy kampe të mëdha, atë pro Sali Berishës dhe Pro Lulzim Bashës, ndërsa kundër këtij të fundit është lajmëruar një protestë të shtunën.

comment Për komente lëvizni më poshtë
Sot mund të lexoni Shfletoni kopertinat