Ngordhin 498 mijë shpendë nga gripi, shfaroset 5% e pulave në vend

Shqipëria

Ngordhin 498 mijë shpendë nga gripi, shfaroset 5% e pulave në vend

Më: 4 prill 2025 Në ora: 17:04
Foto ilustrim

498 mijë pula kanë ngordhur nga gripi i shpendëve deri më tani. Pjesa më e madhe e tyre u infektuan dhe ngordhën gjatë muajit mars, në pularitë e mëdha të Durrësit, që furnizojnë tregun me mish dhe me vezë.

Gripi i shpendëve është përhapur në disa prej pularive të vendit. Prej afro një muaji që nga zbulimi i rastit të parë të influencës aviare, një pjesë kapanoneve me pula janë izoluar dhe sipas shifrave zyrtare, deri më tani kanë ngordhur 498 mijë pula.

Ministria e Bujqësisë ka dalë me një deklaratë, ku bën me dije se pulat e ngordhura tashmë janë asgjësuar përmes procesit të groposjes dhe djegies.

Por në zinxhirin e prodhimit, janë asgjësuar edhe 975 mijë vezë, të cilat ndodheshin në pularitë e infektuara.

Vatra e parë me gripin e shpendëve u njoftua nga Ministria e Bujqësisë më 3 mars në Rrashbull të Durrësit.

Shifrat tregojnë se Shqipëria ka humbur 5% të numrit të pulave që mbarështohen në vend. Rreth 5 milionë pula janë regjistruar në cenuesin e fundit të Ministrisë së Bujqësisë, ndërsa prodhimi vjetor i vezëve arrin në 860 milionë kokrra.

Epidemia e influencës aviare ka ndikuar në çmimet e tregut, por nuk ka dhënë ndikim të fortë në furnizimin e tij. Konsumatori nuk është prekur nga ky virus, dhe nuk rrezikohet, nëse mishi dhe vezët gatuhen në temperaturë mbi 70 gradë Celsius.

comment Për komente lëvizni më poshtë
Sot mund të lexoni Shfletoni kopertinat