Policia zbulon 150 bimë kanabis në Lukovë, arrestohen 2 persona

Shqipëria

Policia zbulon 150 bimë kanabis në Lukovë, arrestohen 2 persona

Më: 15 gusht 2025 Në ora: 12:14
Foto ilustrim

Policia në Himarë ka zbuluar një parcelë, mes fshatrave Lukovë dhe Shën Vasil, ku ishin mbjellë 150 bimë narkotike kanabis sativa dhe ka arrestuar 2 persona si autorë të dyshuar për kultivimin e tyre.

Në kuadër të planit operacional policor antikanabis “Koordinata” u vunë në pranga shtetasit F. S., 62 vjeç dhe Ç. Xh., 47 vjeç.

Këta shtetas u kapën në flagrancë duke u kujdesur për bimët, veprim i dokumentuar edhe në pamje filmike, gjatë monitorimit me mjetet inteligjente dron.

Konkretisht, në përroin mes fshatrave Lukovë dhe Shën Vasil, në një zonë me bimësi të dendur dhe shkurre, këta dy shtetas në bashkëpunim me njëri-tjetrin kishin kultivuar rreth 150 bimë të dyshuara narkotike kanabis sativa.

Në cilësinë e provës materiale u sekuestruan 20 bimë narkotike, ndërsa pjesa tjetër e bimëve u asgjësua nëpërmjet djegies.

Gjithashtu, u sekuestruan 3 telefona celular, vegla pune dhe sende të tjera që përdoreshin nga dy shtetasit për këtë veprimtari kriminale.

Plani operacional policor antikanabis “Koordinata” vijon intensivisht, në të gjithë territorin e qarkut Vlorë.

comment Për komente lëvizni më poshtë
Sot mund të lexoni Shfletoni kopertinat