Dy persona janë arrestuar nga policia e Durrësit, këtë të enjte pasi gjatë natës, kanë prishur qetësinë me zhurmat e marmitave të motomjeteve që drejtonin në sheshin “Taulantia”.
Në pranga kanë rënë 21-vjeçari Kejdi Previzi nga Tirana dhe 24-vjeçari Lorenc Basha nga Durrësi.
Policia ka bërë me dije se nga verifikimet, rezultoi se dy të rinjtë, nuk ishin të pajisur me leje për drejtim të motomjeteve.
“Gjatë patrullimeve 24-orëshe, me objektiv garantimin e sigurisë publike dhe parandalimin e paligjshmërive, shërbimet e Patrullës së Përgjithshme të Komisariatit të Policisë Durrës konstatuan gjatë natës, se 2 të rinj po shqetësonin banorët dhe qytetarët në sheshin “Taulantia” dhe në zonën përreth, nëpërmjet gjenerimit të zhurmave nga sistemet e shkarkimit të 2 motomjeteve që drejtonin. Nga verifikimet e mëtejshme rezultoi se ata nuk ishin të pajisur me leje për drejtim të motomjeteve”, thuhet në njoftimin e policisë.
Ndërkohë, materialet procedurale iu referuan Prokurorisë së Durrësit, për veprime të mëtejshme.