Integrimi në BE në udhëkryq, Bala: Çdo vonesë është një lajm shumë i keq për shqiptarët

Shqipëria

Integrimi në BE në udhëkryq, Bala: Çdo vonesë është një lajm shumë i keq për shqiptarët

Më: 20 maj 2026 Në ora: 21:25
Alban Bala

Shqipëria ndodhet në atë që përshkruhet si momenti më i mirë për të përshpejtuar rrugëtimin drejt Bashkimit Europian, por dinamikat e brendshme politike dhe rreziku i vonesave po kthehen në një kërcënim serioz për këtë objektiv kombëtar.

Analisti Alban Bala, në studion e emisionit “Ora e Betit” në “Ora News” të moderuar nga gazetarja Beti Njuma, deklaroi se interesi madhor publik mbetet një përafrim sa më i shpejtë, sa më i mirë dhe sa më i plotë me BE-në dhe institucionet e saj.

Në këtë kontekst, çdo vonesë apo humbje e këtij momenti konsiderohet një "lajm shumë i keq për të gjithë publikun shqiptar".

Bala theksoi se është thelbësore që qytetarët të kuptojnë efektet reale të një vonese dhe të një "distancimi eventual" nga blloku europian, i cili mund të thellohet më tej. Mbetet ende e paqartë nëse vendimi përfundimtar i partnerëve europianë do të jetë një mbështetje konsensuale apo një bllokim konsensual, por një gjë është e sigurt: Shqipërisë i janë vendosur kushte të qarta.

Përgjigja ndaj këtyre kushteve ka prodhuar një polarizim të theksuar të qëndrimeve në skenën politike, ku palët kundërshtojnë njëra-tjetrën. Megjithatë, Bala tha se vihet re edhe një lloj harmonizimi kur bëhet fjalë për thelbin e shqetësimit të Bashkimit Europian: "ndarja e sistemeve".

Po ashtu Bala nënvizon se kundërshtimi i reformave në drejtësi nga çdo palë politike krijon një "kakofoni logjike" në qëndrimin publik dhe minon parimin e ndarjes së pushteteve. Situata aktuale paraqet një paradoks, ku palët politike, ndërsa përplasen për afrimin me BE-në, njëkohësisht përfshihen në një garë shkatërruese për të parë se "kush kundërshton më shumë, kush rrëzon më shumë dhe kush cenon më shumë", duke dëmtuar kështu procesin integrues.

comment Për komente lëvizni më poshtë
Sot mund të lexoni Shfletoni kopertinat