Qytetarët do të mblidhen sot për të 115-tën ditë në sheshin përpara Kryeministrisë për të kërkuar dorëheqjen dhe largimin e Edi Ramës.
Ata kanë shprehur vendosshmëri se nuk do të heqin dorë nga lëvizja e tyre derisa të bëjnë të mundur rrëzimin e qeverisë, dhe ndryshimin e sistemit.
Protesta pritet të vijojë me grumbullimin e qytetarëve fillimisht në sheshin “Skënderbej”, marshimin drejt bulevardit “Dëshmorët e Kombit”, fjalimet që mbahen para godinës së Kryeministrisë dhe më pas marshimin në rrugët e Tiranës.
Një ditë më parë, krahas largimit të Ramës, ata artikuluan gjithashtu edhe heqjen e imunitetit të Belinda Ballukut si deputete pasi një eurodeputete e shprehu qartë shqetësimin e BE-së në lidhje me faktin se maxhoranca pengoi SPAK disa muaj më parë, kur iu drejtua Kuvendit për arrestimin e saj.
“Rama jep dorëheqjen”, “Ju erdhi fundi”, “Arrestoni Ramën”, “Arrestoni Ballukun”, “Arrestoni Berishën” apo “Shqipëria po bën revolucion”, “Nuk na përfaqësoni” janë disa nga thirrjet që kanë karakterizuar protestën.