SHBA hap rrugën për HIMARS në Shqipëri, paketa 210 milionë dollarë

Shqipëria

SHBA hap rrugën për HIMARS në Shqipëri, paketa 210 milionë dollarë

Nga: Bota sot Më: 19 nëntor 2026 Në ora: 09:18
Fotoilustrim

Departamenti amerikan i Shtetit ka miratuar shitjen e mundshme të sistemeve raketore M142 HIMARS për Shqipërinë, në një paketë të vlerësuar në 210 milionë dollarë. Njoftimi për Kongresin mban datën 17 nëntor.

Sipas njoftimit, qeveria shqiptare ka kërkuar dy lëshues HIMARS, gjashtë kapsula me raketa të drejtuara GMLRS M31A2 dhe gjashtë kapsula GMLRS M30A2 me kokë luftarake alternative. Paketa përfshin edhe tetë sisteme për drejtimin e zjarrit të artilerisë, dy automjete ushtarake, pajisje komunikimi, pjesë këmbimi, trajnim dhe mbështetje teknike.

Blerja do të financohet me kredi të programit amerikan të Financimit Ushtarak të Jashtëm, ndërsa kontraktor kryesor është kompania Lockheed Martin.

Departamenti i Shtetit thotë se shitja forcon sigurinë e një aleati të NATO-s dhe i jep Shqipërisë aftësi për goditje precize në distancë të gjatë. Sipas tij, Forcat e Armatosura shqiptare nuk do të kenë vështirësi t’i përthithin këto pajisje.

Ministri i Mbrojtjes, Ermal Nufi, e mirëpriti vendimin. Ai tha, sipas ATSH-së, se sistemet forcojnë sigurinë kombëtare dhe kontributin e Shqipërisë në NATO.

Miratimi i referohet një shitjeje të mundshme. Kontrata përfundimtare nuk është nënshkruar dhe sasitë e vlera mund të ndryshojnë.

Vendimi vjen në javën kur Kuvendi i Shqipërisë miratoi në parim buxhetin e vitit 2027, i cili parasheh 76,7 miliardë lekë për mbrojtjen, ose 2,61 për qind të PBB-së.

Sot mund të lexoni Shfletoni kopertinat