Edhe sporti skofiar përkatësisht volejbolli ka hasur në telashe të panumërta në vitet e 90-ta, duke u përballur me agresionin e madh të regjimit kriminal serb.
Naim Lakna i takon Gjeneratës së Republikës dhe ka qenë ndër volejbollistët më të dalluar të asaj periudhe.
Si çdo sport edhe volejbolli ishte në presionin e madh, disa ndeshje të tyre u ndërprenë nga milicia serbe, ka pasur edhe shumë zyrtarë të këtij sporti që u maltretuan, u arrestuan dhe u rrahën.
Naim lakna kujton një detaj në Therandë, kur u keqtrajtuan nga milicia serbe.
“Ishim duke luajtur në Therandë kur kanë hyrë policia dhe aty i morën kapitenin e ekipit tonë (KV Arbëria nga Kamenica) dhe atë të Therandës. Ishte një ditë shumë e rëndë dhe siç dihet, kërcënimet e policisë ishin nga më të rënda”, tregon Lakna, që ka qenë prej lojtarëve më të mirë në pozitën e pranuesit.
Ai është krenar që i takoi armatës së sportistëve, duke i bërë rezistencë okupatorit serb dhe i zhvilluan garat e Republikës së Kosovës ashtu si munden në fusha dhe salla të improvizuara. sot ndihet i lumtur kur sheh të rejat dhe të rinjtë, duke lozur të lirë dhe garuar në garat e ndryshme ndërkombëtare.
