Kampionja e Kosovës, Fer Volley, me kryetrajnerin Edon Ibrahimi, mobilizojnë radhët për sfidën e kthimit të Kupës së Evropianë në volejboll.
Liderja e Kampionatit të Kosovës, me padurim e presin sfidën nesërme mbrëma (20.00) ndaj Dudingen nga Zvicra.
Ndeshja luhet në palestrën e sportit “BIll Clinton” në Ferizaj.
Dudingen fitoi në përballjen e parë me rezultat 3:1 ndaj ekipi ferizajase.
Megjithatë Fer Volley Volley beson e shpreson në përmbysjen e këtij rezultati.
Fer Volley është në mesin e 32 ekipeve evropiane.
Kapitenja e ekipit Fer Volley, Gresa Raçi, shpreh optimizmin para sfidës së nesërme.
Raçi luan në pozitën e liberos, është prej volejbollisteve më të mira në vendin tonë.
“Bota sot”: Sa jeni të përgatitur për takimin e kthimit?
Gresa Raçi: Jemi të përgatitur maksimalisht.
Ekipi ka punuar shumë gjatë javës dhe lojtaret janë të motivuara dhe të fokusuar për të dhënë më të mirën nesër.
“Bota sot”: Ku janë përparësitë e Fer Volleyt?
Gresa Raçi: Pika jonë e fortë është bashkëpunimi dhe energjia.
Secila lojtare di rolin e saj dhe të gjithë punojmë për një qëllim të vetëm: fitore.
“Bota sot”: Fer Volley po dominon bindshëm elitën, çka e veçon nga ekipet tjera?
Gresa Raçi: Besimi dhe disiplinimi i ekipit na bëjnë të veçantë.
Përgatitja, motivimi dhe dëshira për të luftuar çdo top na japin një hap përpara ndaj çdo kundërshtari.
“Bota sot”: Ku mendoni se është rreziku më i madh nga ekipi i Zvicrës?
Gresa Raçi: Zvicra ka lojtarë me eksperiencë dhe me shpejtësi në shërbim dhe sulm.
Do të jetë e rëndësishme që të qëndrojmë të fokusuar dhe të reagojmë shpejt ndaj çdo situate.
“Bota sot”: Sa është emocionale të luash në Kupat Evropiane?
Gresa Raçi: Është shumë emocionuese.
Të përfaqësosh Fer Volleyn e Ferizajt dhe të luash në skenën evropiane është gjithmonë një motivim shtesë për të dhënë maksimumin.
“Bota sot”: A janë komplet për sfidën e kthimit?
Gresa Raçi: Po, ekipi është komplet i gatshëm.
Të gjithë lojtaret janë të përqendruara dhe të vendosura për të dhënë më të mirën dhe për të sjellë fitore për Ferizajn.
“Bota sot”: Çka premton si kapitene?
Gresa Raçi: Si kapitene, premtoj përkushtim, motivim dhe energji për çdo lojtar.
Bashkë si ekip, do të japim gjithçka për Ferizajn dhe për tifozët që na mbështesin.
