(E plotësuar 15:30) -Presidentja e Republikës së Kosovës, Vjosa Osmani në ditën e parë të vizitës zyrtare në Estoni është pritur nga homologia e saj, Kersti Kaljulaid.
Te dy presidentet, marrëdhëniet ndërmjet Kosovës dhe Estonisë i kanë vlerësuar të mira dhe kanë shfaqur interesimin për thellimin e mëtejmë të tyre.
Presidentja Osmani ka falënderuar Presidenten Kaljualid për mbështetjen e Estonisë ndaj Kosovës që nga pavarësia e këndej. Në këtë kontekst, Presidentja Osmani ka përmendur edhe mbështetjen që Estonia i ka dhënë Kosovës në Gjykatën Ndërkombëtare të Drejtësisë, por edhe më pas duke marrë pjesë në misionin paqeruajtës në kuadër të KFOR-it.
“Synojmë kultivimin e marrëdhënieve të afërta me vendet e Baltikut, e posaçërisht me Estoninë nga e cila presim mbështetje në procesin e liberalizimit të vizave, anëtarësimit në organizata ndërkombëtare dhe në përgjithësi në rrugën evropiane të Kosovës”, është shprehur Presidentja Osmani. Por, sipas Presidentes Osmani, Kosova dhe rajoni i Ballkanit Perëndimor po përballen me rrezikun e ndikimit rus. Ajo ka thënë se Kosova është vendi më pro evropian, i cili ndan vlerat me demokracinë perëndimore, ndaj ka kërkuar që të qartësohet sa më shpejtë rruga e integrimit në BE-, ngase pavarësisht dyfishimit të kritereve për liberalizim të vizave, ato janë plotësuar tashmë.
Në takim me Presidenten estoneze, Presidentja Osmani ka theksuar se Kosova ka interes të përfitojë nga përvoja e Estonisë në fushën e teknologjisë informative, start up-eve dhe e-qeverisjes.
***
Presidentja e Estonisë: Mbështesim dialogun dhe anëtarësimin e Kosovës në Interpol e UNESCO
Presidentja e Estonisë, Kersti Kaljulaid, ka thënë se vendi që ajo udhëheq mbështet dialogun mes Prishtinës dhe Beogradit, si dhe anëtarësimin e Kosovës në organizata ndërkombëtare, si Interpol dhe UNESCO.
Këto deklarata, e para e shtetit estonez, i bëri në një konferencë të përbashkët për media me presidenten e Kosovës, Vjosa Osmani, e cila po qëndron për vizitë dy ditore në këtë vend.
“Vizita e sotme e Osmanit nuk është surprizë. Është e dukshme që për një vend si Kosova, që po tenton të anëtarësohet në organizata të ndryshme, kjo është mundësi shumë e madhe që të ketë bashkëpunim më të fortë mes institucioneve të ndryshme. Mendoj se kjo është mundësi shumë e mirë edhe për bizneset tona që të vazhdojnë të punojnë. Ne duam që Kosova të jetë sa më e angazhuar dhe më e përfshirë në institucione dhe bashkëpunime të ndryshme ndërkombëtare, përfshirë ato në fushën e sigurisë. Unë mbështes investimet e kompanive tona në Kosova. Por, ne duam të sigurohemi që Kosova garanton këto investime. Estonia ka mbështetur Kosovën në të gjitha organizatat ndërkombëtare dhe do të vazhdojmë të bëjmë një gjë të tillë”, ka thënë Kaljulaid.
Sa i përket dialogut me Serbinë, presidentja e Estonisë tha se vendet e Bashkimit Evropian duhet të ndihmojnë vendet si Kosova dhe Serbia që të ndjekin vlerat demokratike që posedon unioni.
“Marrëveshjet gjeopolitike janë më të mirat gjithmonë. Andaj, nëse Evropa dëshiron të mbrojë vlerat e saj, duhet t’i sjell këto vende sa më afër demokracisë. Ne duam t’i përfshijmë të gjitha vendet në këtë sistem demokratik me të cilin operojmë. Pa ndihmën e BE-së, këto vende nuk janë në gjendje të ndjekin këto vlera demokratike”, ka deklaruar ajo.
Për të tërhequr sa më shumë investime të kompanive nga Estonia, Kaljulaid deklaroi se Kosova duhet të angazhohet për sundim të ligjit.
“Duhet të keni institucione të fuqishme dhe sundim të ligjit, sepse kjo është gjëja e vetme që sjell zhvillim ekonomik. Përndryshe, kompanitë nuk guxojnë të investojnë përderisa nuk besojnë se me të vërtet interesi i tyre po mbrohet”, tha ajo tutje.
***
Presidentja, Vjosa Osmani, ka deklaruar se Kosova është e vendosur që të vazhdojë dialogun me Serbinë dhe të ketë bashkëpunim me të gjitha vendet fqinje, përfshirë Serbinë, pavarësisht faktit se ky shtet ende nuk ka kërkuar falje për krimet në rajon. Ajo ka thënë se Kosova ka qëllime të qarta në dialog dhe assesi nuk do të pranojë lëvizje të kufijve.
Këto deklarata Osmani i bëri në një konferencë të përbashkët për media me presidenten e Estonisë, Kersti Kaljulaid.
Osmani ka thënë se kjo fazë e dialogut është një kapitull i ri për Kosovën.
Megjithatë, ajo deklaroi se Kosova ka disa linja të kuqe, se çka nuk do të vihet në diskutim në takimet e Brukselit.
“Kosova është e vendosur që të vazhdojë dialogun dhe ne kemi vazhduar të bashkëpunojmë me vendet fqinje, përfshirë Serbinë, e cila ende nuk ka kërkuar falje për krimet e kryera në rajon. Kjo fazë e dialogut është një kapitull i ri për Kosovën, por ne kemi linja të kuqë se çfarë nuk do të vihet në diskutim. Nuk e diskutojmë assesi statusin tonë final. Kosova është vend i pavarur. Po ashtu, lëvizjën e kufijve nuk do ta pranojmë në asnjë mënyrë. Nuk do të pranojmë në Kosovë as modele si ajo e Republikës Serbe në Bosnjë, sepse ne duam ta mbrojmë Kosovën. Këto konsensione ne i kemi bërë me planin e Ahtisaarit. Një çështja e rëndësishme është edhe ajo e personave të zhdukur. Serbia duhet të tregojë se ku janë të zhdukurit”, ka deklaruar ajo.
Kujtojmë se Osmani po qëndron për një vizitë dy ditore në Estoni, ku do të pritet nga liderët shtetëror të këtij vendi, përfshirë presidentin e Parlamentit, Jüri Ratas dhe kryeministren Kaja Kallas.
***
Presidentja e Republikës së Kosovës, Vjosa Osmani është pritur me nderime të lartë në Estoni, ku do ta realizojë një vizitë dy ditore.
Para pak çastesh, Osmani është takuar me presidenten e Estonisë, Kersti Kaljulaid.
Gjatë ditës, Osmani pritet të takohet edhe me presidentin e Parlamentit të Estonisë, Jüri Ratas, kryeministren Kaja Kallas, si dhe kryesuesin e Komitetit për çështje evropiane, Siim Kallas.
Këtë vizitë në Estoni, Osmani e ka cilësuar si mundësi të mirë për vendosjen e bashkëpunimit me shtetin, i cili bart primatin në nivel global për E-qeverisje.
Presidentja ka theksuar se vizita në Estoni do t`i hapë rrugë vendosjes së bashkëpunimit bilateral ndërmjet dy shteteve, por edhe ndërmjet bizneseve. Sipas Osmanit, Kosova mund të përfitojë nga përvoja e Estonisë nga fusha e teknologjisë informative, ekonomia mbrojtja, siguria, arsimi, shëndetësia, turizmi dhe shkëmbimi kulturor.
Dita e dytë e vizitës së Osmanit, do t`i kushtohet agjendës transformuese digjitale me ç`rast do të bëhen vizita në ‘E-Estonia Briefing Center’ dhe ‘Telliskivi Creative City’. Me ftesë të presidents, në delegacion do të jenë edhe përfaqësues të tri kompanive të fushës së inovacionit nga Kosova: Mërgim Cahani (Gjirafa), Jeta Zagraxha (UCK) dhe Uranik Begu (ICK).
***
Presidentja e Republikës së Kosovës, Vjosa Osmani, ndodhet për një vizitë në Estoni me ftesë të autoriteteve shtetërore të Estonisë.
Gjatë qëndrimit dyditor, Osmani do ta ketë takim me presidenten e Estonisë, Kersti Kaljulaid, presidentin e Parlamentit, Jüri Ratas, kryeministren Kaja Kallas, si dhe kryesuesin e Komitetit për çështje evropiane, Siim Kallas.
Presidentja Osmani, vizitën në Estoni e ka cilësuar mundësi të mirë për vendosjen e bashkëpunimit me shtetin i cili bart primatin në nivel global për E-qeverisje. Dita e dytë e vizitës, do t`i kushtohet agjendës transformuese digjitale me ç`rast do të bëhen vizita në e-Estonia Briefing Center dhe Telliskivi Creative City.
Me ftesë të presidentes Osmani në delegacion do të jenë edhe përfaqësues të tri kompanive të fushës së inovacionit nga Kosova: Mërgim Cahani (Gjirafa), Jeta Zagraxha (UCK) dhe Uranik Begu (ICK).
Presidentja Osmani ka theksuar se vizita në Estoni do t`i hapë rrugë vendosjes së bashkëpunimit bilateral ndërmjet dy shteteve, por edhe ndërmjet bizneseve. Sipas Osmanit Kosova mund të përfitojë nga përvoja e Estonisë nga fusha e teknologjisë informative, ekonomia mbrojtja, siguria, arsimi, shëndetësia, turizmi dhe shkëmbimi kulturor.
Republika e Estonisë e ka njohur Republikën e Kosovës më 21 shkurt të vitit 2008, ndërkaq marrëdhëniet diplomatike janë vendosur nga prilli i të njëjtit vit.
