Reuters shkruan për situatën në veri të Kosovës: Serbët zhbllokojnë rrugët, NATO-ja i jep fund mosmarrëveshjes për targat

Aktuale

Reuters shkruan për situatën në veri të Kosovës: Serbët zhbllokojnë rrugët, NATO-ja i jep fund mosmarrëveshjes për targat

Më: 2 tetor 2021 Në ora: 11:47
Serbët e Kosovës kalojnë nëpër barrikada pranë pikës kufitare mes Kosovës dhe Serbisë në Jarinje, Kosovë, 28 shtator 2021. REUTERS/Laura Hasani

Agjencia e njohur e lajmeve, Reuters, ka raportuar për fillimin e zbatimit të marrëveshjes së arritur në Bruksel mes Kosovës dhe Serbisë për targat e veturave.

Serbët i larguan kamionët dhe veturat që e bllokonin kufirin me Kosovën të shtunën, pasi trupat e NATO-s u vendosën sipas një marrëveshjeje të ndërmjetësuar nga BE-ja për t’i dhënë fund mosmarrëveshjes mes vendeve fqinje për targat e veturave.

Pritet që edhe policia speciale e Kosovës të tërhiqet nga pikëkalimi kufitar në veri të vendit rreth dy javë pasi serbët i bllokuan rrugët, kur Kosova vendosi targa të përkohshme të veturave për të gjitha veturat nga Serbia.

Qeveria e Kosovës tha se vendimi është hakmarrje për masat serbe kundër vozitësve nga Kosova që nga viti 2008, kur Kosova e shpalli pavarësinë nga Serbia.

Serbia nuk e njeh pavarësinë e Kosovës, prandaj veprimet e saj si regjistrimi i veturave dhe konfrontimi i këtij muaji arritën në dhunë.

Megjithatë, të dyja vendet, me ndërmjetësimin e të dërguarit të posaçëm të BE-së, Miroslav Lajçak, të enjten arritën marrëveshje për të përdorur etiketa në targat e veturave për t’i mbuluar simbolet shtetërore dhe që ta lejojnë NATO-n, që ka rreth 3.000 trupa në Kosovë, për ta kontrolluar zonën.

Serbët lokalë të shtunën biseduan me ushtarët sllovenë, të cilët janë pjesë e forcës së NATO-s, përderisa ata po i largonin barrikadat e veturat e policisë së Kosovës qëndronin në pikëkalimin kufitar. Afati i fundit për tërheqjen e tyre është ora 4 e pasdites.

commentFirst article
Sot mund të lexoni Shfletoni kopertinat