(E plotësuar 20:48 ) - Qeveria e Republikës së Kosovës sot ka mbajtur mbledhje elektronike, në të cilën ndër të tjera ka miratuar katër projektligje dhe masat e rejat për kontrollin, parandalimin dhe luftimin e pandemisë COVID-19.
Vendimi i parë në mbledhjen e sotme ka qenë ai për miratimin e masave të përgjithshme dhe të veçanta për kontrollin, parandalimin dhe luftimin e pandemisë COVID-19.
Masat e plota
Katër projektligjet e miratuar në mbledhjen e sotme janë:
1. Projektligji për ratifikimin e marrëveshjes ndërmjet Republikës së Kosovës dhe Republikës së Maqedonisë së Veriut për statusin e pjesëtarëve të Forcave të Sigurisë së Republikës së Kosovës dhe Ushtrisë së Republikës së Maqedonisë së Veriut gjatë qëndrimit të tyre të përkohshëm në territoret e shteteve përkatëse.
2. Projektligji për borxhin shtetëror dhe garancitë shtetërore i cili përcakton rregullat e parimeve kryesore dhe procedurave të huamarrjes shtetërore, emetimit të garancive shtetërore, pagesave të kryegjësë dhe interesit për borxhin shtetëror, pagesat e garancive shtetërore të thirrura si dhe shpenzimeve tjera të ndërlidhur me to.
3. Projektligji për ratifikimin e marrëveshjes ndërmjet Republikës së Kosovës dhe Asociacionit Ndërkombëtar për Zhvillim lidhur me financimin e Programit – Nxitja dhe levimi i mundësive për sigurinë e ujit. Marrëveshja i siguron Kosovës një kredi në vlerë prej njëzetepesë milionë e njëqind mijë euro (25,100,000 €) për të asistuar në financimin e projektit.
4. Projektligji për ratifikimin e memorandumit të mirëkuptimit ndërmjet Ministrisë së Arsimit, Shkencës, Teknologjisë dhe Inovacionit me Ambasadën e Shteteve të Bashkuara të Amerikës për Programin Shkëmbimit Akademik Fulbright.
Qeveria ka miratuar vendimin për Kalendarin vjetor të përkthimit të acquis të Bashkimit Evropian në gjuhët zyrtare të Republikës së Kosovës. Ky kalendar do të publikohet në ueb-faqen e Zyrës së Kryeministrit dhe lista e akteve të BE-së do të procedohet për përkthim. Gjatë përgatitjes së këtij Kalendari janë konsultuar departamentet ligjore të ministrive dhe Komisioni Teknik për Koordinimin e përkthimit të legjislacionit të BE-së, bazuar në Marrëveshjen e bashkëpunimit ndërmjet Kosovës dhe Shqipërisë për krijimin e Komisionit Teknik për përkthimin e legjislacionit të BE-së në gjuhën shqipe.
Qeveria po ashtu ka miratuar edhe kalendarin e aktiviteteve për vitin 2022, vit i shpallur si “Viti i personave me aftësi të kufizuara në Republikën e Kosovës” nga Kuvendi i Republikës së Kosovës.
Më tej në mbledhjen e sotme është shfuqizuar vendimi i Qeverisë së Republikës së Kosovës të datës 5 qershor 2018, për emërimin e zëvendësdrejtorit për shërbime administrative-financiare në Agjencinë e Shërbimit të Navigacionit Ajror. Sikurse është anuluar edhe vendimi i Qeverisë i datës 11 qershor 2019, në bazë të së cilit ishte miratuar rekomandimi i ministrit të atëhershëm të Mbrojtjes për ristrukturimin e disa pozitave në këtë Ministri.
Kërkesa e Ministrisë së Financave, Punës dhe Transfereve për kursime, ndarje dhe harmonizime buxhetore për të mundësuar harmonizimin e ndarjeve buxhetore në kategorinë e pagave dhe shtesave për muajin nëntor të viti 2021, ka marrë miratimin e Qeverisë në këtë mbledhje.
Kabineti qeveritar i ka rekomanduar Presidentes së Republikës së Kosovës që të autorizojë Ministrin e Financave, Punës dhe Transfereve për nënshkrimin e dy marrëveshjeve ndërkombëtare:
1. Marrëveshjen e kredisë ndërmjet Republikës së Kosovës dhe Bankës Evropiane për Zhvillim dhe Rindërtim për Projektin e trajtimit të ujerave të zeza në Mitrovicë.
2. Marrëveshjen e kredisë ndërmjet Republikës së Kosovës dhe Bankës Evropiane për Investime për zhvillimin e Projektit të zhvillimit të impiantit për ujërat e zeza në Mitrovicë.
Njësoj ka vepruar edhe për dhënien e autorizimit Ministres së Drejtësisë për nënshkrimin e Marrëveshjes për Ndihmë të Ndërsjellë Juridike në Çështjet Penale me Konfederatën e Zvicrës.
Në fund, kabineti qeveritar në mbledhje është informuar edhe për mbledhjen e IV të Këshillit të Stabilizim-Asociimit ndërmjet Bashkimit Evropian dhe Kosovës, e cila do të mbahet me 7 dhjetor 2021 në Bruksel.
Këto janë masat anti-COVID që pritet të hyjnë në fuqi
Qeveria e Kosovës po diskuton për masat e reja Anti-COVID. Zëdhënës për informim në MSh kanë thënë se do t’ua propozojnë Qeverisë disa masa të reja bazuar në situatën epidemiologjike në rajon.
Qeveria e Kosovës po mban mbledhje elektronike ku po diskutohet për masat e reja Anti-COVID.
Media ka marrë vesh se masat përgjithësisht do të jenë të njëjta.
Kufizimi i qarkullimit të qytetarëve do të vazhdoj të jetë nga ora 00:00 deri në ora 05:00, ndërsa, qytetarët do të vazhdojnë të mbajnë edhe më tej maska.
Ministria e Shëndetësisë ka propozuar që çdo person që hyn në Kosovë duhet të ketë certifikatën e vaksinimit të plotë ose certifikatën e vaksinimit për vaksinimin me një dozë, jo më e vjetër se katër javë, bashkë me testin RT-PCR negativ për COVID-19, jo më i vjetër se 48 orë.
Ndërsa, shtetasve të Republikës së Kosovës, si dhe personave me leje qëndrimi të përkohshëm ose të përhershëm në Kosovë, të cilët nuk posedojnë ndonjë nga dëshmitë 2.1 deri 2.3 dhe kërkojnë të hyjnë në territorin e Republikës së Kosovës, iu jepet mundësia të vaksinohen nga ekipet mobile të vendosura në pikën kufitare ANP “Adem Jashari (për ata që hyjnë në rrugë ajrore), dhe në pikat kufitare në Vërmicë, Merdare, Dheu i Bardhë, Hani i Elezit (për ata që hyjnë në rrugë tokësore).
Obligohen institucionet publike e private, si dhe subjektet tjera, të mbajnë dezinfektues për duar dhe një sasi të maskave në vende të qasshme në hyrje të objektit si dhe në ambientet e brendshme.
Sipas MSH’së, obligohen institucionet publike e private, si dhe subjektet tjera që në hyrje të çdo objekti të vendosin shenja të dukshme të rregullave të sjelljes për mbrojtje nga COVID-19, përfshirë shenjën e ndalimit të hyrjes në objekt pa maska, respektimin e distancës.
Po ashtu, obligohen përgjegjësit e institucioneve publike e private dhe subjektet e tjera që të kryejnë dezinfektimin dhe ajrosjen e hapësirave të mbyllura.
Ndërsa, të gjithë punonjësit e institucioneve publike, si dhe personeli i ndërmarrjeve publike në pronësi të Qeverisë apo të një komune, duhet të posedojnë certifikatën e vaksinimit të plotë, ose certifikatën për vaksinimin me një dozë bashkë me dëshminë se personi ka kaluar COVID-19 në mënyrë që t’ju lejohet hyrja në ambientet e punës.
Zëdhënës për informim në Ministrinë e Shëndetësisë kanë thënë sot se do t’ua propozojnë Qeverisë masat e reja bazuar në situatën epidemiologjike në rajon.
Sipas tyre, këto masa pritet të miratohen së shpejti dhe të zbatohen nga të gjithë.
“Disa masa të reja do të propozohen nga MSh për Qeverinë, bazuar në situatën epidemiologjike dhe rreziqet që mund të vijnë edhe nga varienti Omicron, dhe ato pritet të miratohen së shpejti dhe duhet të zbatohen nga të gjithë. Zbatimi i masave me korrektësi dhe vaksinimi janë aktualisht rruga që duhet ndjekur për të parandaluar përkeqësimin e situatës”, është thënë nga MSH.
Tutje nga Ministria e Shëndetësisë kanë thënë se sistemi shëndetësorë në Kosovë është i mobilizuar për t’u përballur me çfarëdo varianti në teren.
“Është e drejtë që kur në cilindo kontinent apo shtet shfaqet ndonjë variant i ri, situata të trajtohet me seriozitet dhe sistemi të mbahet i mobilizuar në maksimum për t’u ballafaquar me çfarëdo skenari në terren. Këtë po e bën edhe sistemi shëndetësor në Kosovë, me të gjitha kapacitetet që i ka”, thuhet tutje nga kjo ministri.
Kryetari i Asociacionit të Komunave të Kosovës, Sazan Ibrahimi ka thënë se ata nuk janë informuar për ndonjë takim në lidhje me masat e reja.
Ai ka thënë se janë të njoftuar se takimi do të mbahet këtë javë, por që ende nuk kanë marrë ndonjë informatë për ditën e kohën.
Përndryshe, ai ka thënë se MSH e qeveria mund të marrin masa të reja edhe pa u konsultuar me ta.
“Unë pak mëherët shikova email’in dhe nuk kisha marrë asnjë njoftim për takim. Nga Ministria e Shëndetësisë kanë thënë se takimi do të mbahet këtë javë. Besoj që masat do të jenë të njëjta. Ne ende nuk jemi informuar për takimin”, ka thënë ai.
Kujtojmë që Kosova po regjistron shifra të ulta të infektimeve me COVID-19, ndonëse situata në rajon paraqitet krejtësisht ndryshe.
Ekspertë të shëndetësisë kanë paralajmëruar rëndim të gjendjes me pandeminë edhe në vend.
Dy ekspertët austriak të shëndetësisë, Stefan Thurner dhe Peter Klimek në një shkrim të publikuar në “DerStandard”, kanë thënë se Kosova tashmë e ka kaluar valën e saj të katërt, mirëpo sipas tyre, vendi mund ta paguaj me çmim të lartë pandeminë.
“Në fund të gushtit, kur incidenca në Austri ishte ende mjaft e ulët në rreth 140, me një mesatare shtatëditore prej 1000 rastesh për milion banorë, atje numëroheshin më shumë infeksione se kurrë më parë. Shembulli i Kosovës tregon kaq qartë. Vdekshmëria e tepërt atje në fund të shtatorit – të dhënat më të fundit të disponueshme nga kjo pikë në kohë – ishte mbi 160 për qind. Kjo do të thotë: në atë moment kohe, më shumë se dy herë e gjysmë njerëz vdiqën në Kosovë sesa do të pritej të vdisnin në një vit normal. Ata gjithashtu vdiqën sepse kaq shumë njerëz që u infektuan në të njëjtën kohë sa që sistemi ishte i mbingarkuar”, ka shtuar Klimek.
Vende të rajonit, si Shqipëri, Maqedonia, Serbia e Mali i Zi tashmë që një kohë po regjistrojnë shifra të larta të infektimeve me COVID-19.
Një gjendje më e rëndë po paraqitet nga shtetet si Gjermania, Holanda e Britania.
