Emisari britanez takohet me Osmanin dhe Kurtin, ja çka diskutuan

Ka përfunduar takimi i Kurtit me të dërguarin e posaçëm të Britanisë së Madhe, Lordin Stuart Peach.

Mediat kanë raportuar se në takim ka marrë pjesë edhe ambasadori britanik, Nicolas Abbot.

Para se të takohej me Kurtin, Peach është takuar edhe me presidenten Osmani.

Presidentja e Republikës së Kosovës, Vjosa Osmani ka pritur në takim të dërguarin e posaçëm të Mbretërisë së Bashkuar për Ballkanin Perëndimor, Lordin Stuart Peach, të cilin e ka uruar për emërimin në Dhomën e Lordëve.

Në takim me Lordin Peach, Presidentja Osmani ka theksuar se institucionet e Republikës së Kosovës janë të përkushtuara dhe të angazhuara për paqe dhe siguri.

Presidentja Osmani vuri në pah se Kosova vazhdon të jetë e koordinuar me partnerët ndërkombëtar për adresimin e sfidave të sigurisë dhe në këtë kontekst ka kërkuar përfshirje më të madhe të Britanisë së Madhe si një anëtare kyçe e NATO-s dhe një partnere historike e Kosovës.

Teksa e ka njoftuar për zhvillimet e fundit në vend, Lordin Peach, Presidentja Osmani ka theksuar se Kosova në vazhdimësi është palë konstruktive në raport me dialogun me Serbinë, porse pala serbe nëpërmjet përpjekjeve për destabilizim të Kosovës përpiqet ta zhvendosë fokusin nga dialogu.

Në këtë frymë, Presidentja Osmani ka kërkuar që ndaj tendencave destabilizuese të Serbisë, bashkësia ndërkombëtare ta mbajë një qëndrim unik duke dënuar veprime e tilla dhe duke mos bërë barazimin e palëve kur dihet qartë se kush është agresori.

Sipas Presidentes Osmani, në veriun e Kosovës, sfidimi i rendit ligjor dhe juridik po ndodh nga banda kriminale të armatosura, të dirigjuara nga lidershipi i Serbisë, të cilat ndodhen në listën e zezë të SHBA-ve dhe Britanisë së Madhe.

Kësisoj, Presidentja Osmani theksoi se është nën përgjegjësinë e institucioneve të Kosovës në koordinim me partnerët ndërkombëtarë për ta siguruar sundimin e ligjit, paqes dhe sigurisë në mënyrë të barabartë në të gjithë Republikën e Kosovës dhe për të gjithë qytetarët pa dallim.

Përfaqësuesi i Britanisë së Madhe për Ballkanin Perëndimor, Stuart Peach, është pritur në takim edhe nga kryeministri i Kosovës, Albin Kurti.

Pas takimit me presidenten Osmani, Peach do të diskutojë edhe me kreun qeveritar për situatën aktuale në vend dhe dialogun Kosovë-Serbi.

Takimi po mbahet i mbyllur për media, derisa të njëjtat u lejuan të marrin pamje vetëm gjatë hyrjes së emisarit të Britanisë së Madhe në objektin e Qeverisë së Kosovës.

Gjatë muajit janar është paralajmëruar se do të vijnë në Kosovë dhe Serbi një delegacion i nivelit të lartë të BE-së dhe ShBA-së për intensifikimin e dialogut Kosovë-Serbi.