Pas disa ditësh punimesh intensive, njësia B1 e Termocentralit Kosova B është rikthyer sot me sukses në operim, duke i dhënë një shtysë të rëndësishme stabilitetit të furnizimit me energji në vend.
Korporata Energjetike e Kosovës (KEK sh.a.) njoftoi se ndonëse përfundimi i punimeve ishte planifikuar brenda një afati prej 48 orësh, angazhimi i jashtëzakonshëm i ekipeve teknike ka bërë që ndërhyrjet të përfundojnë më herët. Procesi i startimit të njësisë nisi rreth orës 15:30, ndërsa në ora 18:39, njësia u sinkronizua me rrjetin elektroenergjetik, duke u kthyer në funksionim të plotë dhe të qëndrueshëm.
Gjatë kësaj periudhe KEK thotë se janë realizuar sanime të thella teknike, përfshirë:
Zëvendësimin e rreth 30 gypave të dëmtuar në kaldajë;
Eliminimin e rrjedhjeve në kondenzator me riparimin e rreth 410 gypave;
Ndërhyrje në skarat e djegies për përmirësimin e performancës;
Riparime në barrierën termike të pompës furnizuese PF1;
Sanimi i filtrit elektrik në 7 nga 8 fushat funksionale.
Kryeshefi Ekzekutiv i KEK-ut, Gramos Hasani, ka falënderuar ekipet për përkushtimin dhe profesionalizmin, duke theksuar se ky është “rezultat i punës ekipore dhe një shembull i shkëlqyer i menaxhimit teknik nën presion”.
