Inspektorati ndërpret shfrytëzimin e ujit nga “Drena” në Skenderaj

Aktuale

Inspektorati ndërpret shfrytëzimin e ujit nga “Drena” në Skenderaj

Nga: A.SH Më: 26 shtator 2026 Në ora: 18:36
Fotoilustrim

Ministrja e Mjedisit, Fitore Pacolli, ka njoftuar se Inspektorati i MMPH-së, në bashkëpunim me IHMK-në, ka kryer inspektime te operatori “Drena” në Skenderaj, prodhues i lëngjeve “RUKO” dhe produkteve të bylmetit

Sipas Pacollit, kompania shfrytëzonte katër puse dhe deri në 10 mijë litra ujë në ditë, ndërsa ujërat e përdorura shkarkoheshin pranë lumit Klina pa Leje Ujore.

Shfrytëzimi i ujit është ndërprerë deri në pajisjen me leje, ndërsa për mungesën e impiantit për trajtimin e ujërave të përdorura, kompania është gjobitur me 3 mijë euro dhe është obliguar të vendosë e funksionalizojë impiantin.

Postimi i plotë:

Në mbrojtje të ujërave të Kosovës!

Inspektorati i MMPH-së, në bashkëpunim me IHMK-në, ka zhvilluar inspektime në terren ndaj operatorit SH.P.K. “Drena” në Skenderaj, prodhues i lëngjeve “RUKO” dhe produkteve të bylmetit “Drena”.

Për linjën e prodhimit të lëngjeve, operatori shfrytëzonte katër puse vetanake dhe përdorte deri në 10 mijë litra ujë në ditë, ndërsa ujërat e përdorura shkarkoheshin në afërsi të lumit Klina, pa Leje Ujore nga Ministria.

Shfrytëzimi i ujit për këtë linjë është ndërprerë dhe nuk do të lejohet vazhdimi i veprimtarisë deri në pajisjen me Leje Ujore.

Edhe për linjën e përpunimit të qumështit janë konstatuar shkelje. Për mungesën e impiantit për trajtimin e ujërave të përdorura, operatori është gjobitur me 3 mijë euro dhe është obliguar të vendosë e funksionalizojë impiantin.

Bizneset vendore duhet të zhvillohen dhe të rriten, por gjithmonë duke respektuar ligjin dhe duke mbrojtur pasuritë tona natyrore.

comment Për komente lëvizni më poshtë
Sot mund të lexoni Shfletoni kopertinat