Finalja e Kupës së Kosovës ka vënë përballë Golden Eagle Yllin dhe Sigal Prishtinën.
Therandasit do të mundohen të fitojnë këtë trofe për herë të parë, kurse prishtinasit për herë të 15-të. Prishtinasit kanë përvojë, por skuadra therandase me përforcimet që i ka bërë do të mundohet të triumfojë në palestrën e saj. Ylli ishte edhe në finale të edicionit të kaluar, por ishte mundur në finale nga Peja.
Ylli në çerekfinale mundi Bashkimin, kurse në gjysmëfinale, Rahovecin. Ndërkohë, rruga e prishtinase kaloi duke mundur Pejën dhe Ponte Prizrenin.
Trajneri i Yllit, Fatih Gezer, ka thënë pas ndeshjes me Rahovecin se, ky turne është shumë i rëndësishëm, andaj sigurisht se do të mundohen ta fitojnë, gjithmonë, duke respektuar edhe skuadrën kundërshtare.
Ndërkohë, Dragan Radoviq ishte trajner i Yllit në pjesën e parë të edicionit dhe e njeh shumë mirë skuadrën therandase.
Ndeshja zhvillohet të dielën nga ora 17:30 në Suharekë, aty ku janë duke u zhvilluar të gjitha ndeshjet e garave të Kupës.
Kujtojmë se në palestrën “13 Qershori” janë zhvilluar të gjitha ndeshjet e Final 8, Final 4 të Kupës së Ligës së Parë dhe do të zhvillohet edhe finalja e femrave.
