Rritja e numrit të trajnereve...

Basketboll

Rritja e numrit të trajnereve...

Më: 12 gusht 2022 Në ora: 16:07
Rritja e numrit të trajnereve...

Federata e Basketbollit e Kosovës (FBK) ju bën thirrje të gjitha ish-basketbollisteve dhe basketbollisteve që janë në përfundim të karrierës e që dëshirojnë të vazhdojnë karrierën e tyre në basketboll, si trajnere, refere apo edhe delegate.

Federata e Basketbollit e Kosovës ndër pesë (5) Qëllimet në Planin Strategjik 2021-2025 e ka si qëllim të veçantë “Gratë dhe Vajzat në Basketboll” nëpërmjet të cilit qëllim synon ti realizoj objektivat e saj, e që janë rritja e numrit të vajzave që e praktikojnë sportin e basketbollit, rritja e numrit të trajnereve, refereve, delegateve, administratoreve dhe udhëheqëseve nëpër klube.

Sekretarja e Përgjithshme e FBK-së, Elvira Dushku në lidhje me Thirrjen për ish-basketbollistet dhe basketbollistet që janë në përfundim të karrierës për faqen zyrtare të FBK-së ka thënë:

“Mendoj se kjo është një mundësi shumë e mirë për ish-basketbollistet dhe basketbollistet që janë në përfundim të karrierës që të paraqiten për tu bërë trajnere, refere, apo delegate në garat e basketbollit të organizuara nga FBK. Ne dëshirojmë që basketbollistet apo ish basketbollistet që tashmë janë pensionuar të mbesin pjesë e komunitetit në forma të ndryshme, në mënyrë që të kemi sa më shumë rol modele për vajzat e reja. Në të njëjtën kohë ne duam ta rrisim kualitetin tek trajneret, referet e delegatet, dhe mendojmë se mënyra më e mirë është nëpërmjet edukimeve që organizohen nga FBK në bashkëpunim me FIBA-n.

Andaj ju bëjë thirrje të gjitha ish-basketbollisteve dhe basketbollisteve që janë në përfundim të karrierës, që nëse dëshirojnë të vazhdojnë të mbesin në basketboll, të aplikojnë për njërën nga tri fushat e lartcekura. Ne do ti përkrahim ato në të gjitha format, sepse jemi shumë të interesuar të rrisim nivelin e basketbollit femëror në të gjitha sferat, qoftë në fushën e lojës, qoftë edhe jashtë saj”.

Federata e Basketbollit e Kosovës planifikon që pas përmbylljes së afatit (01 Shtator 2022) të organizojë kurse e punëtori të veçanta për trajnere, refere e delegate në mënyrë që ato të jenë sa më të gatshme për të filluar punën e tyre.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat