Ditë më parë kryetari i AKR-së, Behgjet Pacolli ka dhënë një deklaratë për media në lidhje me kryeministrin e vendit, Albin Kurti.
Pacolli është shprehur i gatshëm që t’i jap pjesë nga programi i tij Qeverisë Kurti. Ai thotë se këtë e bën veç për hir të Kosovës.
Ditë më parë kryetari i AKR-së, Behgjet Pacolli ka dhënë një deklaratë për media në lidhje me kryeministrin e vendit, Albin Kurti.
Pacolli është shprehur i gatshëm që t’i jap pjesë nga programi i tij Qeverisë Kurti. Ai thotë se këtë e bën veç për hir të Kosovës.
“S’kemi kontakt me Kurtin. Kontaktet janë ndërprerë prej momentit kur ia kam dorëzuar detyrën në qeverisjen e parë, por jam i gatshëm t’iu jap pjesë të programit për hir të Kosovë, për arsye se te unë ndahet shapi prej sheqerit. Kur flitet për interesat e Kosovës atëherë bien poshtë interesat ideologjike, partiake dhe personale. Këto janë synimet e mia. Nëse është diçka e mirë për Kosovën jam i gatshëm të kontribuoj edhe në të ardhmen”, ka thënë ai.
Pacolli gjithashtu u shpreh se partinë e Kurtit e pa si bashkëpunëtore për implementimin e programit të tij qeverisës, për të cilin tha se ishte shumë ambicioz.
“Ne me Vetëvendosjen kemi pasë një tentativë që të bashkëpunojmë në të ardhmen. Kemi punuar në vitin 2016 që të harmonizojmë programet tona. Kam qenë gati i bindur se mos Vetëvendosje është ajo partia e cila do të marrë shumëçka prej programit tonë dhe do ta ketë program të ardhshëm qeveritar”, ka deklaruar Pacolli.
Ndër të tjera, lideri i AKR-së, tha se përkundër që ka qenë pjesë e qeverisjes në të kaluarën, nuk ka arritur të zbatojë planet e tij në mënyrën si ka dashur për të krijuar vendet e reja të punës.
Analistët politikë për “Bota sot”, thonë se propozimi i Pacollit është një dështim politik nga ana e kryetarit të AKR-së.
Sipas tyre, është e palogjikshme ky propozim pasi të njëjtin nuk e kanë votuar qytetarët.
Mehmeti: Kurti të mos e marrë parasysh propozimin e Pacollit për ofrimimin e programit
Në lidhje me këtë temë, në një prononcim për “Bota sot”, ka folur analisti politik, Faton Mehmeti, i cili u shpreh se nuk ka kuptim deklarata e Pacollit për ofrimin e programit për Kurtin.
Sipas analistit, Pacolli mund ta ketë për qëllim të mirë këtë program mirëpo që qytetarët kanë votuar programin e Kurtit.
“Albin Kurti kur ka kandiduar për kryeministër, këtë e ka bërë me një program të cilin qytetarët e kanë votuar. S'ka kuptim t'i propozohet Kurtit të marrë një program të dikujt tjetër e të cilin qytetarët nuk e kanë votuar, ta lë anash një program për të cilin ata kanë votuar. Kjo s'ka logjikë, kjo logjikë mesjetare nuk funksion sot. Pavarësisht se Pacolli mund të ketë qëllimin e mirë, kështu nuk shkojnë gjërat. Askund në botë nuk ndodh kjo që thotë Pacolli”, u shpreh ai.
Ndër të tjera, analisti thotë se kryeminsitri duhet ta injorojë këtë propozim të Pacollit pasi është program që nuk është votuar nga qytetarët.
“Në këtë kuptim, pres që Albini ta injorojë, edhe më të drejtë. Pacolli, nëse dëshiron të bëjë projekte të mira, të bëhet këshilltar i Albinit (nësë Albini e pranon), të jap ide dhe mendime, por jo nga kampi opozitar të paraqet programin e tij të cilin nuk e kanë votuar qytetarët”, tha Mehmeti për “Bota sot”.
Zeqa: Deklarata e Pacollit, dështim politik
Ndërsa, analisti tjetër politik, Florim Zeqa, në një bashkëbisedim me “Bota sot”, thotë se propozimi i Pacollit për t'i ofruar pjesë të programit politik, është një dështim politik dhe aspak serioze.
Ai shton se nëse Pacolli do të mendonte për Kosovën, nuk do të bënte çdo koalicion politik për t’u futur në parlament.
“Gatishmërinë e kryetarit të AKR-së, z. Behgjet Pacolli për ta ndihmuar qeverinë Kurti 2 duke i dhënë pjesë të programit politik, nuk duhet kuptuar ndryshe veçse një deklaratë të një të dështuari politik i cili duke u bërë patericë e të gjitha partive në pushtet e solli partinë e vet në prag të zhbërjes fizike. Deklaratat e kryetarit të AKR-së jo vetëm që nuk janë serioze, nuk janë aspak të ekuilibruara. Sikurse liderët e tjerë partiak, edhe Behgjet Pacolli e thotë se çdo gjë që e bën, e bën për Kosovën. Por sikur ta kishte me njëmend nuk do t’i bashkohej çdo koalicioni politik për t’u futur në parlament”, thekson analisti.
Zeqa më tej shton se kjo ide është kurth për Kurtin mirëpo që në bazë të rrëshqitjet e njëpasnjëshme të Albin Kurtit në mbrojtjen e parimeve politike, është e mundur kjo formë e bashkëpunimit.
“Andaj, edhe në këtë rast, ideja e Pacollit është që të futet nën kthetrat e Albin Kurtit, gjegjësisht të bëhet pjesë e qeverisë për hir të interesave të tij personale për zhvillimin e lirshëm dhe pa pengesa të veprimtarisë afariste në Kosovë! Se a do ta merr Albin Kurti në konsideratë kërkesën për bashkëpunim të Behgjet Pacollit apo jo varet nga rrethanat politike dhe strategjike të kryeministrit. Bazuar në rrëshqitjet e njëpasnjëshme të Albin Kurtit në mbrojtjen e parimeve politike, është e mundur kjo formë e bashkëpunimit mes këtyre dy figurave të politikës së Kosovës”, potencoi Zeqa për “Bota sot”.