“Përgjigjen ta japë Albin Kurti”/ Bytyçi jep detajet: A janë këto arsyet pse kryeministri nuk u prit në Shtëpinë e Bardhë?

Politika

“Përgjigjen ta japë Albin Kurti”/ Bytyçi jep detajet: A janë këto arsyet pse kryeministri nuk u prit në Shtëpinë e Bardhë?

Nga: P.R Më: 24 maj 2022 Në ora: 21:17
Kryeministri i Republikës së Kosovës, Albin Kurti gjatë vizitës në SHBA

Kryeministri i Republikës së Kosovës, Albin Kurti ka qëndruar për vizitë në Shtetet e Bashkuara të Amerikës për më shumë së dy javë.

Gjatë qëndrimit në SHBA, edhe pse vizitoi institucione të shumta e takoi personalitete të ndryshme, Kurti nuk arriti që ta vizitojë Shtëpinë e Bardhë, për çka u kritikua nga ish kryeministrit, Avdullah Hoti.

“Shëtitje në shumë adresa, përpos në adresën që për botën demokratike, dhe për shqiptarët në veçanti, është adresa e të gjitha adresave: Shtëpia e Bardhë. Parimisht, vizita në Shtëpinë e Bardhë mundëson qasje të suksesshme në të gjitha adresat e tjera, e jo e kundërta”, shkroi ish kryeministri, tash deputet i LDK-së, Avdullah Hoti.

Kritika për Kurtin ka pas edhe nga partitë opozitare, Lidhja Demokratike e Kosovës, Partia Demokratike e Kosovës dhe Aleanca për Ardhmërinë e Kosovës.

E për vizitën e Kurtit në SHBA, për gazetën “Bota sot” ka folur profesor, doktor Enver Bytyçi,

Image
Enver Bytyçi

“Kryeministri Kurti qëndroi më shumë se dy javë në Shtetet e Bashkuara të Amerikës. Një vizitë kaq e gjatë nuk ka ndodhur me paraardhësit e tij. Shumë nga analistët dhe opinionistët, si dhe politikanët opozitarë në Kosovë e kanë konsideruar këtë vizitë të dështuar. Sipas tyre shkaku ishte fakti që kryeministri i vendit nuk takoi dikë me rëndësi të madhe në Shtëpinë e Bardhë. Unë nuk e di nëse vizita u zhvillua me iniciativën e Kurtit, apo pati ndonjë ftesë zyrtare. Por besoj se ai nuk e kishte një ftesë të tillë”, thotë Bytyçi, i cili tregon edhe arsyet pse vizita e Kurtit në SHBA nuk mund të quhet e dështuar.

“Nëse do kishte ftesë, natyrisht që do të pritej së paku nga shefi i diplomacisë amerikane. Prandaj dhe unë nuk e konsideroj si një vizitë të dështuar. Por njëkohësisht do të doja që kryeministri i Kosovës të pritej si shtetar në nivelet më të larta të shtetit amerikan. Kjo nuk mund të ndodhte në kushtet e një vizite gati private të tij”.

Më tej, Bytyçi thotë se në Shtëpinë e Bardhë ka një lloj hezitimi, për çka Kurti është informuar edhe nga Gabriel Escobar.

“Megjithatë çdokush ka të drejtë të shtrojë dy dilema: Së pari, pse nuk i është bërë një ftesë zyrtare kryeministrit të vendit? Pse ai nuk u prit edhe në kushtet e vizitës joformale nga ndonjë personalitet i lartë amerikan, Presidenti, zv. Presidentja ose Sekretari i Shtetit? Përgjigjen mund ta japë Albin Kurti. Por në perceptimin tim ka një lloj hezitimi në Shtëpinë e Bardhë dhe në Departamentin e Shtetit. Pritja që ia bëri Gabriel Escobar dhe biseda me të ndoshta e ka sqaruar këtë moment. Por duke mos dashur të spekuloj, besoj se gjithçka ka të bëjë me raportet e Kurtit me Evropën dhe ndërkohë edhe me raportet e SHBA-ve po me Evropën. E kam thënë edhe herë të tjera: Nëse shqiptarët në Ballkan e hoqën qafe pas rënies së komunizmit dilemën me Perëndimin apo me Lindjen, tani do të përballen me dilemën Evropë-SHBA. Nëse do të ketë probleme dhe konflikte midis Evropës dhe SHBA-ve, atëherë ato do të reflektohen në qëndrimin ndaj Kosovës”, deklaron Bytyçi.

Sipas tij, Albin Kurti ka dëshmuar një afërsi të dukshme me vendet e Bashkimit Evropian.

“A ka bërë gabim? Nuk mund të them se është gabim të mbështetesh te politikat evropiane. Sepse ne jemi në Evropë dhe duam të integrohemi në këtë kontinent. A është e mundshme që të ruash një ekuilibër marrëdhëniesh me të dy aktorët? Eshtë e vështirë, por nuk është e pamundur. Besoj se në SHBA ka politikanë, të cilët nuk i shohin me sy të mirë lidhjet e zotit Kurti me evropianët, sidomos me gjermanët”, nënvizon Bytyçi, sipas të cilit, Kurti po shihet edhe si ‘pengesë’ në dialogun mes Kosovës dhe Serbisë.

“Por ka edhe një arsye tjetër: Kurti po shihet si “pengesë” për dialogun me Serbinë. Së paku amerikanët po e thonë vazhdimisht. I kërkojnë që të pranojë Asociacionin me Serbinë dhe ekstraterritorialitetin e Kishës Serbe në Kosovë, sidomos të Manastirit të Deçanit. Shkurt po i kërkojnë të lëshojë sovranitet në dobi të Serbisë. Kjo do të thotë se ka kaluar tashmë koha, kur amerikanët mbështesin pa kushte të drejtën e shqiptarëve. Kjo do të thotë se duhet të bëhemi më të kujdesshëm dhe të kemi kontakte të vazhdueshme me SHBA-të, të punojmë ngushtë me ta, të kërkojmë ndihmën dhe mbështetjen e tyre për të drejtën, t’i bindim në parimet e së drejtës e kështu me radhë. Nuk do të thotë që të bëjmë heroin”.

“Çështja e dytë lidhet me pyetjen tjetër: Pse u desh që kryeministri i Kosovës të qëndrojë 17-18 ditë në SHBA! Në këtë pikë nuk shoh ndonjë gjë të keqe. Përkundrazi, të gjithë e dinë se Albin Kurti nuk shkoi në SHBA për ëikend. Ai është punëtor dhe me siguri ka punuar për të forcuar disa lidhje që çojnë në konsolidimin e marrëdhënieve të Kosovës me SHBA-të. Kjo është gjë e mirë dhe madje e mirëpritur”, shpjegon Bytyçi.

Bytyçi shprehet se Kurti e Osmani duhet ta zgjedhin çdo herë SHBA-në, pavarsisht zgjidhjeve tjera që mund të vijnë në të ardhmen.

“Megjithatë kryeministri, presidentja dhe të tjerë liderë në Kosovës do të duhet që në zgjedhjen midis SHBA-ve dhe mbrojtjes së shtetësisë e të territorit të Kosovës, të zgjedhin këtë të dytën. Nëse ata e mbrojnë sovranitetin dhe integritetin do ta tërheqin në mbështetje të tyre Uashingtonin. Nëse thyhen, atëherë nuk do të dëmtojnë vetëm Kosovën, por edhe marrëdhëniet e saj me SHBA-të. Sepse nëse bëhen lëshime në sovranitet shtetëror dhe integritet territorial në favor të Serbisë, atëherë do të ketë shumë shqiptarë, të cilët do të fajësojnë edhe SHBA-të. Kjo gjë nuk i vlen as Kosovës, as SHBA-ve”.

“Nëse Kurti dhe të tjerët rezistojnë në këto dy çështje, atëherë në plan afatgjatë ruhen edhe marrëdhëniet e konsoliduara me SHBA-të. Në fund të fundit ka një zgjidhje të fundit: T’u thuhet amerikanëve se çfarë ata duan në Kosovë dhe për ata të premtohet edhe cenimi i sovranitetit shtetëror. Por për Amerikën e jo në favor të Serbisë! Sa kohë SHBA-të e kërkojnë këtë në favor të Serbisë, kjo nuk mund të pranohet!”, përfundon për “Bota sot”, profesor, doktor Enver Bytyçi.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat