Po armatosej nga Serbia, kjo është banda që synonte destabilizimin në veri – kërkohet intervenim nga ndërkombëtarët!

Politika

Po armatosej nga Serbia, kjo është banda që synonte destabilizimin në veri – kërkohet intervenim nga ndërkombëtarët!

Arife Morina Nga Arife Morina Më 26 nëntor 2022 Në ora: 10:02
Foto ilustrim

Situata në veri të vendit, ka qenë e tensionuar muajt e fundit, pas provokimeve të vazhdueshme të Serbisë dhe serbëve të organizuar në grupe kriminale, në këtë pjesë të vendit tonë.

Krahas kësaj, ditë më parë shefi i EULEX-it z. Lars-Gunnar Wigemark e ka pranuar se në veri ka persona të armatosur mirë, që nuk janë nga veriu, me shumë gjasë nga Serbia.

Kjo po e konfirmon faktin se Beogradi vazhdon të instalojë politika të saj te serbët në Kosovë, madje edhe duke dhënë direktiva se si të veprojnë ndaj institucioneve të Kosovës.

“Ne kemi informacione se disa njerëz janë duke u armatosur. Situata është mjaft e tensionuar, dhe për këtë arsye ne i bëjmë thirrje të gjithëve palëve, që të ruajnë qetësinë, dhe të mos përfitojnë në dëm të paqartësisë së kësaj situate. Dhe natyrisht e dimë që në veri të Kosovës ka grupe kriminale. Nuk duam asnjë situatë që mund të jetë e ngjashme me situatën e luftës, ne do t’i pengojmë këto provokime, dhe që të mos luajnë me zjarrin”, tha ndër të tjera shefi i EULEX-it.

Mirëpo, pavarësisht këtyre informacioneve dhe deklaratave askush nuk po e fajëson Serbinë për armatosjen e serbëve në veri.

Madje, ende nuk dihet dhe nuk ka informata se kush është prapa organizimit "Brigada e veriut".

Shala: Serbia i furnizon, i trajnon, i mbështetë, por në publik distancohet në të gjitha format

Image
Drizan Shala

Në lidhje me këtë temë, në një prononcim për “Bota sot” foli eksperti i sigurisë, Drizan Shala.

Fillimisht, ai tregoi përbërjen e “Brigadës së veriut” dhe qëllimin e saj, ku si synim ka shantazhimin e institucioneve ndërkombëtare.

“Brigada e veriut është një grup i përbërë nga: kriminelët, mercenarët si dhe strukturat paralele të Serbisë, etj.

Kjo "Brigadë" në vete ka elemente të cilat tentojnë që të shantazhojnë institucionet ndërkombëtare të sigurisë dhe politikës, por gjithashtu të Kosovës dhe që në fakt këta të fundit situatën e kanë nën monitorim të thellë në të gjitha dimensionet ekuivalente”, deklaroi eksperti i sigurisë.

Krahas kësaj, Shala potencoi se armët serbët po i marrin nga grupet e kontrabandistëve, që si qëllim kanë destabilizimin e situatës në veri.

“Armët e presupozuara janë armë që kryesisht rrjedhjen e kanë nga grupet e kontrabandistëve, të cilët tentojnë që situata të përkeqësohet në favor të aktiviteteve të tyre kriminale dhe në dëm të shtrirjes së autoritetit të Kosovës në atë pjesë”, vlerësoi ai.

Ndër të tjera, eksperti i sigurisë tha se shteti serb po tenton të krijojë alibi për veprime politike.

“Pra, Serbia i furnizon, i trajnon, i mbështetë, por në publik distancohet në të gjitha format e tij dhe kështu tenton të krijojë alibi për veprime politike”, përfundoi Drizan Shala për “Bota sot”.

Mehmeti: Pranimi për persona të armatosur rëndë në veri është serioz

Image
Faton Mehmeti

Ndërsa, analisti politik, Faton Mehmeti në një bashkëbisedim me gazetën kritikoi qasjen e BE-së dhe EULEX-it ndaj Kosovës.

Ai konsideron se këto të fundit janë treguar më të rrepta me Kosovën, se me Serbinë.

“Fatkeqësisht BE-ja dhe EULEX-i si pjesë e saj asnjëherë nuk janë treguar neutrale në raport me Kosovën dhe Serbinë. Gjithnjë janë munduar të tregohen më të rrepta me Kosovën dhe ledhatuese me Serbinë”, u shpreh analisti.

Sipas tij, është shqetësuese fakti se si nuk ndërmerret asgjë, kur deklarohet se ka armatosje serioze në veri.

Ai kërkon intervenimin e KFOR-it në veri për ç’armatosjen e bandave kriminale.

“Pranimi për persona të armatosur rëndë në veri është serioz, nuk mjaftohet vetëm me prezantimin e gjendjes, por edhe me aksion. KFOR-i si i vetmi autoritet i armatosur në veri duhet të intervenojë për të çarmatosur bandat e armatosura atje. Fatkeqësisht po lejohet edhe nga bashkësia ndërkombëtare të ketë konflikt në veri”, përmbylli Faton Mehmeti për “Bota sot”.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat