Shqipëria, Kroacia dhe Kosova së bashku kanë nënshkruar marrëveshjen ushtarake trepalëshe në fushën e mbrojtjes.
“Shqipëria, Kroacia dhe Kosova do të jenë bashkë edhe më fuqishëm përballë sfidave dhe synimeve të përbashkëta në fushën e mbrojtjes dhe të sigurisë”, ka thënë mes tjerash minsitri Ejup Maqedonci.
Analisti Driton Tali ka thënë se bashkëpunimi ushtarak mes Kosovës, Shqipërisë dhe Kroacisë është një zhvillim i rëndësishëm për sigurinë rajonale, sidomos në një kohë kur rendi global po sfidohet dhe rregullat e lojës mbeten të paqarta.
"Deklarata e Bashkëpunimit Trepalësh Ushtarak në mes Kosovës, Shqipërisë dhe Kroacisë" është lajmi më i mirë që e kemi patur goxha për një kohë të gjatë sa i përket sigurisë. Sidomos kur të merret parasysh se "Rendi i Moçëm Botëror", ku ShBA nëpërmes NATO's ishte garantuese e paqës dhe demokracisë, tashmë është i sfiduar me një "Rend të Ri Botëror" ku ende nuk janë të qarta rregullat e lojës”, thotë ai.
Tutje, Tali shprehet se pavarësisht kësaj marrëveshjeje, Kosova duhet të vijojë fuqizimin e FSK-së dhe të veprojë si partner i barabartë me aleatët, e jo si viktimë.
"Sidoqoftë, Qeveria e Re e Kosovës, edhe më tutje prioritet duhet ta ketë armatosjen e FSK'ës, për shumë arsye, ku dy më të rëndësishmet janë atmosfera e armatosjes e krijuar tashmë e dy muaj me mantren "që secili duhet të kujdeset për sigurinë e vet e jo të presi krejtësisht nga ShBA", por edhe "Deklarata e Bashkëpunimit Trepalësh" nuk do të thotë që ne tashti "shpresat për sigurinë e Republikës sonë t'i bartim nga ShBA dhe KFOR'i tek Kroacia.
Prandaj të sillemi si partner me dy shtetet mike, në këtë marrëveshje, e jo si viktimë".
Në fund, thekson se, Serbia dhe presidenti Vuçiç po përballen me probleme të brendshme dhe një situatë të pasigurt ndërkombëtare, çka e bën edhe më të nevojshme vigjilencën e Kosovës dhe mekanizmave të saj të sigurisë.
“Sa i përket mesazhit që i dërgon rajonit, me theks të veçantë Serbisë, gjegjësisht Vuçiçit, njëherë për njëherë shihet se ai është i zënë me problemet e brendshme të cilat goxha ja kanë luhatur pozicionin, dhe çështja tjetër është relacioni në mes Trumpit dhe Putinit. Vuçiçi është i vetëdijshëm që Putini e sakrifikon atë pa lodhur fare kokën (ashtu siç bëri me oligarkët e tij të cilët vet Putini i krijoi dhe vet Putini i eliminoi). Këto janë sipas, mendimit tim, brengat kryesore që ka Vuçiçi tani.
Ndonëse gjithmonë ekziston rreziku për orkestrim të ndonjë trazire në Kosovë (apo Bosnje a Mal të Zi) me qëllim të tërheqjes së vëmendjes nga ato probleme.
Prandaj, jo vetëm mekanizmat tonë, të sigurisë, por e gjithë shoqëria, duhet të jemi syçelë në këtë periudhën që po kalon jo vetëm rajoni”, përfundon ai për “Bota sot”.
