U rrëzua në gjendje të dehur dhe lëndoi këmbën, por në spital tha se u plagos me armë, arrestohet

Shqipëria

U rrëzua në gjendje të dehur dhe lëndoi këmbën, por në spital tha se u plagos me armë, arrestohet

Më: 26 dhjetor 2020 Në ora: 10:15
Pamje nga vendi i ngjarjes

Ka rezultuar i rremë raportimi një natë më parë i 52-vjeçarit, Faik Zeqja, nga Maqellara e Dibrës për plagosje me armë zjarri.

Ai ishte paraqitur në spital me lëndime në këmbë dhe kishte deklaruar për bluzat e bardha se ishte plagosur me armë zjarri.

“Në orët e mbrëmjes së datës 25.12.2020, shtetasi F. Z., është paraqitur për ndihmë mjekësore në qendrën shëndetësore Maqellarë, i cili pretendonte se ishte plagosur me armë zjarri nga disa persona të pa identifikuar”.

Menjëherë është ngritur një grup i posaçëm hetimor për zbardhjen e ngjarjes dhe nga veprimet e shpejta e profesionale të kryera nën drejtimin e Prokurorisë ka rezultuar se në aksin rrugor Shupenzë-Maqellarë, shtetasi F. Z., duke drejtuar automjetin tip ‘kamionçinë’, në gjendje të dehur dhe në sens të kundërt të rrugës, në momentin që ka zbritur nga automjeti, është dëmtuar në pjesën e këmbës dhe ka qëndruar në mes të rrugës.

Shtetasit F. Z., i është bërë testi i alkoolit me aparatin Drager, i cili ka rezultuar në gjendje të dehur në masën 0.61 mg/l.

Në përfundim të veprimeve të para hetimore, nga specialistët e Policisë Rrugore, u bë arrestimi në flagrancë i shtetasit: F. Z., 52 vjeç, banues në Majtarë, Dibër për veprat penale “Drejtim i automjetit në mënyrë të parregullt” dhe “Kallzim i rremë”.

Materialet procedurale i kaluan Prokurorisë Dibër për veprime të mëtejshme.

Shfaq komentet
comments powered by Disqus
Sot mund të lexoni Shfletoni kopertinat