Kuvendi zgjidh sot një boshllëk të krijuar në lidhje me dosjet e krijuara nga Operacioni Forca e ligjit.
Afati i punës së kësaj njësie të posaçme ishte caktuar me akt normativ deri në fund të vitit që kaloi dhe ishte ende e paqartë se çfarë duhet të bënin organet e tjera si SPAK me këto dosje. Për këtë arsye, u përcaktua me ligj që të gjitha dosjet e krijuara nga OFL deri në 31 dhjetor, do të vazhdojnë të shqyrtohen nga ana e SPAK dhe dhe Gjykata e Posaçme kundër Krimit të Organizuare dhe Korrupsionit.
Bëhet fjalë për dosjet e sekuestrimit të pronave të ish të dënuarve për trafiqe. Në rrjetën e OFL ranë shumë emra të njohur të krimit, të cilët tani pas përfundimit të mandatit të kësaj njësie të veçantë policore do përballen me SPAK. Deputeti Alket Hyseni relator i këtij ndryshimi i bëri një bilanc punës së deritanishme të OFL.
Puna një vjeçare e OFL u përqendrua në dërgimin e formularëve për të provuar pasuritë e vëna nga ata të cilët janë dënuar nga gjykatat shqiptare dhe të huaja. Krijimin e OFL, kryeministri Edi Rama e quajti si një vendosmëri të shumicës qeverisëse kundër krimit të organizuar dhe atyre që i etiketoi si korporata “Kap Ça të Kapësh.”
