Disa ditë pasi fitoi betejën me koronavirus, mjeku Pëllumb Pipero tregon se si e kaloi këtë periudhë. Megjithëse tashmë e ka kaluar koronavirusin, Pipero pritet të bëjë të hënën vaksinën anticovid. Mjeku tregon se gjendjen e tij shëndetësore ua besoi kolegëve në Shqipëri.
Me lodhje dhe stres, e kaloi mjeku Pëllumb Pipero koronavirusin.
Infektimi i tij konsiderohet i veçantë, pasi rezultoi pozitiv vetëm dy javë nga injektimi i dozës së parë të vaksinës.
Por, pavarësisht se ka fituar antitrupa gjatë kësaj periudhe, mjeku thotë se të hënën do të marrë dozën e dytë.
Edhe një herë ai hodhi poshtë lajmet se ishte kuruar jashtë Shqipërisë, duke sqaruar se në Itali shkon shpesh pasi ka familjen, por jo gjatë periudhës që ka qenë i infektuar.
“Ku doli lajmi se isha në Itali, unë isha në Razëm. Nuk kam qenë në Itali për kurim, por kam familjarë atje. Jam mjekuar këtu.”
Zgjodhi të mos bëhej mjeku i vetes e kërkoi asistencën e kolegëve.
“Ishte doktor Arjan Harxhi, doktor Mezini, doktoreshë Najada, doktor Mondi, Genti dhe disa të huaja.”
Edhe gjate kohës që ishte sëmurë e ka ndjekur situatën e pandemisë.
Rastet e riinfektimeve nuk i mohoi, por tha se janë të rralla.
“2-3 rastet që kam konstatuar unë kanë qenë asimptomatikë.”
Për arrestimet e kolegëve të akuzuar për korrupsion, Pipero nuk mban anë.
“Janë raste të rralla dhe nuk na e zbardhin faqen. Janë çështje në duart të drejtësisë, prandaj është më mirë të mos japim opinione.”
Vetë ai do t’i rikthehet të hënën vizitave të pacientëve në spitalin Infektiv.
