Rritja e përgjithshme e çmimeve dhe në veçanti rritja e çmimit të naftës ka sjellë zemërimin e qytetarëve të cilët janë mbledhur sërish sot në ditën e dytë të protestës para godinës së Kryeministrisë në Tiranë.
Në protestë marrin pjesë fermerë, studentë, pensionistë dhe qytetarë të Tiranës.
Ajo që vihet re është shtrëngimi i masave të policisë, ndryshe nga një ditë më parë.
Me pankarta në duar, qytetarët kanë bërë thirrje për uljen e disa taksave që përfshihen në çmimin e karburantit në mënyrë që t’u lehtësohet kostoja e jetesës.
Protesta kundër rritjes së çmimeve janë duke u zhvilluar paralelisht në disa qytete të Shqipërisë pasditen e së enjtes.
Qytetarët kanë thënë se do të vazhdojnë sërish të protestojnë deri të shtunën ndërsa presin reflektim nga qeveria.
