Përmbytjet në vend, Rama mbledh nesër Komitetin e Emergjencave

Shqipëria

Përmbytjet në vend, Rama mbledh nesër Komitetin e Emergjencave

Më: 8 janar 2026 Në ora: 13:46
Foto ilustruese, Rama dhe përmbytjet

Situata e përmbytjeve në vend mbetet problematike, ndërsa autoritetet kanë intensifikuar masat për përballimin e emergjencës. 

Mësohet se ditën e nesërme në orën 8:30, pritet të mblidhet Komiteti i Emergjencave, i cili do të drejtohet nga kryeministri Edi Rama.

Në mbledhje, do të analizohet situata aktuale dhe çfarë ndërhyrjesh të tjera shtetërore do të duhet të ndërmerren. Gjithashtu do të diskutohet edhe për dëmshpërblimet për të prekurit nga kjo situatë.

Ndërkohë, Ministri i Mbrojtjes, Pirro Vengu, ka shpallur ditën e sotme evakuim të menjëhershëm për banorët e Novoselës, për shkak të rrezikut të lartë nga përmbytjet. Evakuime janë njoftuar gjithashtu edhe në disa zona të qarkut Durrës.

Sipas Ministrisë së Mbrojtjes, qarqet më problematike mbeten Shkodra, Lezha, Durrësi, Fieri, Berati dhe Gjirokastra. Fatkeqësisht, nga përmbytjet në Durrës është regjistruar edhe viktima e parë.

Në qytetin e Durrësit, 250 persona janë strehuar në Shtëpinë e Pushimit të Forcave të Armatosura, ndërsa 55 persona të tjerë janë sistemuar në Kovalishencën e Ministrisë së Brendshme. Paraditen e sotme, lumi Erzen ka dalë nga shtrati, duke shkaktuar përmbytje në disa zona.

Situata mbetet kritike edhe në Vlorë, ku niveli i lumit Vjosë në zonën e Novoselës ka kaluar mbi 9 metra. Janë evakuuar 13 familje pranë Urës së Mifolit dhe në Novoselë. Në terren janë angazhuar rreth 150 efektivë të Forcave të Armatosura, mbi 20 mjete të rënda, 10 gomone shpëtimi dhe 15 pompa thithëse.

comment Për komente lëvizni më poshtë
Sot mund të lexoni Shfletoni kopertinat