Deri në 100% të qirasë së banesës mund të mbulohet nga Bashkia e Korçës për familjet që përballen me vështirësi ekonomike dhe nuk kanë mundësi të sigurojnë vetë një strehim. Përmes programit të subvencionimit të qirasë, bashkia synon të mbështesë familjet e pastreha dhe kategoritë në nevojë, duke u lehtësuar një prej shpenzimeve më të rëndësishme mujore.
Programi bashkefinancohet nga Bashkia e Korçës dhe buxhetit te shtetit. Çdo vit përllogaritet vlera mesatare e qirasë në tregun e lirë dhe në bazë të të ardhurave të familjes, përcaktohet edhe masa e subvencionimit.
Gjatë këtij viti, nga kjo skemë kanë përfituar 29 familje, të cilat kanë plotësuar kriteret dhe dokumentacionin e kërkuar. Mbështetja nuk është e kufizuar vetëm për një vit, pasi bonusi mund të përfitohet edhe në vijim, për sa kohë familjet plotësojnë kushtet e përcaktuara në ligj.
Programi i strehimit social nuk përfshin vetëm familjet që jetojnë në qytetin e Korçës, por edhe banorët e njësive administrative në zonat rurale. Drejtoria e Strehimit iu bën thirrje të gjithë individëve dhe familjeve që kanë nevojë për mbështetje për të siguruar një banesë, të aplikojnë brenda afatit të përcaktuar, deri në fund të nëntorit.