Kosova dha shembull jo vetëm për shtetet e rajonit se si organizohet një ngjarje e madhe siç ishte Kampionati Ballkanik U-20 në volejboll, në konkurrencën e meshkujve.
Për disa ditë me radhë, kryeqyteti i Kosovës, Prishtina, ishte mikpritës i Kampionatit Ballkanik U-20.
Trajneri i mirënjohur Xhavit Kajtazi, aktualisht kryetrajner i KV Prishtina Volley, tha se kampionati ishte shumë i mirë, me përjashtim të disa shteteve që nuk morën pjesë për shkaqe politike.
“Organizimi i Kampionatit ishte shumë i mirë dhe për këtë Kosova ka marrë lëvdata edhe nga shtetet pjesëmarrëse dhe asociacionet përkatëse ndërkombëtare.
Kësaj ngjarjeje, për fat të keq, për shkaqe politike, i munguan pesë kombëtare: BeH, Greqia, Moldavia, Rumania dhe Serbia”, thotë Kajtazi për gazetën kombëtare “Bota sot”.
Kajtazi flet edhe për cilësinë që ka pa gjatë një jave në kryeqytet.
“Cilësia e volejbollit që pamë gjatë një jave në Prishtinë ishte e kënaqshme.
Morën pjesë gjashtë kombëtare: Shqipëria, Bullgaria Kosova, Maqedonia e Veriut, Mali I Zi dhe Turqia… Titullin e fitoi me plot meritë Bullgaria, ndërsa është pritur më shumë nga Turqia, që doli e dyta…
Mali i Zi ka bërë një hap përpara që iu shpërblye me vendin e tretë.
Maqedonia dhe Shqipëria po ashtu patën paraqitje dinjitoze, por që u desh të kënaqen me vendin e katërt dhe të pestë.
Kosova luajti mirë në hapje të Kampionatit kundër Maqedonisë së Veriut, por edhe kundër Shqipërisë.
Më së shumti këtë shfaqje e dëmtoi mungesa e shikuesve, të cilët për fat të keq nuk u panë në Pallatin e sportit në Prishtinë (hiq disa dhjetëra sish në ndeshjet e Kosovës dhe të Turqisë)”, shprehet Kajtazi.
