Dervishaj: Trajneri të kryen punën vetëm si trajner e jo t’i ketë dy a tri punë apo biznese 

Volejboll

Dervishaj: Trajneri të kryen punën vetëm si trajner e jo t’i ketë dy a tri punë apo biznese 

Nga: Kemajl Goca Më: 29 korrik 2022 Në ora: 18:36
Bujar Dervishaj

Volejbolli i Kosovës nuk është në nivelin e dëshiruar, dëshmia më e mirë janë rezultatet e dobëta për vite me radhë qoftë me klubet qoftë me Kombëtaret e Kosovës të femrat dhe të meshkujt.

Trajner i mirënjohur, Bujar Dervishaj, aktualisht trajner i Qendrës nacionale të volejbollit në Zvicër, flet pa dorëza për gazetën kombëtare “Bota sot”. 

Dervishaj shpreh shqetësimet e tija dhe tregon pse nuk ka pranuar të udhëheq kombëtaren e Kosovës.

Image

Bujar Dervishaj

Legjenda e volejbollit, habitet se si i gjithë komuniteti i volejbollit tw Kosovws udhëhiqet nga dy - individë dhe po ashtu thotë se një trajner duhet të ketë edhe një apo dy asistent të tij, jo një trajner të ketë 20-30 apo 40 fëmijë.   

“Bota sot”: Bujar, si e sheh volejbollin në Kosovë, ka rritje apo stagnim?

Bujar Dervishaj: Për të ec përpara me volejbollin e Kosovës na duhen dy gjëra: Pa një filozofi dhe trajnim të njëjtë tek Shkollat e Volejbollit ne nuk do të prodhojmë shumë lojtar të cilësisë botërore, të cilët do të luanin nëpër Ligat e forta Evropiane dhe e dyta, sa me shumë Yje që do të kemi aq ma mirë dhe me lehtë do të jetë, se ata do të ishin shembull për gjeneratat e reja të cilat do të vijnë. 
 

Dhe duke parë se çka i duhet volejbollit tonë në bashkëpunim me Federatën e Volejbollit, bëra Projektin për Akademinë e Trajnerëve për Volejboll e cila gjë u aprovua nga Komiteti Olimpik dhe besoj se shpejti do të filloj. Projekt i cili do të prodhoj trajner të rinj dhe sa më shumë të investojmë te ata aq më shumë do të kemi cilësi nëpër shkollat e volejbollit të cilat janë shumë në Kosovë dhe me shumë masë të madhe, kështu që me përkushtim e durim të gjejmë “Diamant” apo Yje të së ardhmes tek kjo masë. 

“Bota sot”: Një kohë keni mbajtur trajnime me volejbolliste dhe volejbollistë në Kosovës, çfarë iu mungon?

Bujar Dervishaj: Po seminari i fundit që kam mbajt në bashkëpunim me FVK ishte në dhjetor të vitit të kaluar, ku ishin 63 trajnerë dhe shfrytëzova rastin të sjell nga Zvicra në bashkëpunim me Federatën e Volejbollit të Kantonit Aargau material apo pajisje për 6 ekipe. 
Çdo Seminar apo ide që e kam e kam bërë pa lekë dhe i vetmi qëllim ishte dhe do të jetë në të ardhmen që këtë zanat dhe përvojë time t’ju ofroj trajnerëve të rinj.

“Bota sot”:  Kush janë fajtorët që volejbolli nuk po shënon rezultate më të mira?

Bujar Dervishaj: Me pyete se çka ju mungon? Ju mungon sipas mendimit tim një filozofi e trajnimit sa me e thjeshtë dhe e lehtë të shpjegohet dhe trajnohet tek shkollat dhe ekipet. 
Ndërsa kush është fajtor unë nuk e di por mendoj se çdo Federatë, Shkollë apo Ekip të ketë më shumë kuadro dhe njerëz e jo të udhëhiqen nga një person (one man show thonë anglezet) dhe trajneri të kryen punën vetëm si trajner e jo t’i ketë dy a tri punë apo biznese. 
Dhe me duhet fatkeqësisht ta ceki se mentaliteti sportiv është thjesht i keq sepse mungon modestia dhe çka është më qesharakja ata edhe vetveten e emërojnë si baba apo babëgjyshi i volejbollit, ndërsa kur te dalin jashtë Kosove e shohin realitetin se ende janë bebe të vogla. 

 “Bota sot”: Djali juaj luan për Kombëtaren e Gjermanisë, një sukses i madh, sikur të ishte punuar pak më vëmendshëm në Kosovë, a do të kishim edhe shumë si Leoni?

Bujar Dervishaj: E ceka edhe më lartë se sa më shumë të kemi lojtarë apo “Yje” aq më mirë do të jetë për gjeneratat e reja që vijnë dhe me një Leon Dervishaj, Gazmend Husaj, Rukije Muja e disa të tjerë është pak dhe jam i sigurt me punë të mirë do të kemi edhe më shumë… 
Mirëpo komuniteti i volejbollit është shumë pak i informuar për këta emra dhe bënë shumë pak për këta lojtarë e kush është aty fajtor nuk është problemi im por sa më shumë bëjmë reklam aq më shumë do të përfitojmë tek gjeneratat e reja dhe ato të informohen se nëse bëhesh lojtar i mirë mundesh edhe të jetosh nga volejbolli.

Momentalisht kemi këta lojtarë të cilët kane kontrata 6 - shifrore por këtë gjë nuk e dijnë gjeneratat e reja dhe paramendoni njëkohësisht ke mundësinë të kryesh studimet dhe të luash profesionalisht. 

“Bota sot”: Sa janë të organizuar klubet në Kosovë për dallim nga ato zvicerane dhe gjermane?

Bujar Dervishaj: E ceka edhe më herët puna dhe përgjegjësia rreth organizimit të një shkolle, ekipe apo federate të ndahet dhe secili të merr përgjegjësinë e tij. Psh: një trajner të ketë edhe një apo dy asistent të tij e jo një trajner të ketë 20-30 apo 40 fëmijë në një trening plus të merret me pagesa, material etj. etj. 

Thjesht e kam frikën se Shkollat e Volejbollit të mos bëhet vetëm biznes por t’ju ofrojnë atë që ju duhet lojtarëve të rinj e të reja. 

“Bota sot”: Po si e sheh volejbollin femëror, a kemi mungesë lojtaresh cilësore?

Bujar Dervishaj: Për volejbollin femëror nuk do te them shumë por e di se tek femrat ka shumë më shumë që merren me volejboll, se tek meshkujt është më lehtë të prodhohen Yje por a është arrit ajo nuk ma merr mendja dhe rezultatet jashtë Kosove nuk janë edhe diçka të mira. 

“Bota sot”: A po lihen anash emrat që duhet të angazhohen në kombëtare dhe në klube, apo e kanë hapësirën e merituar?

Bujar Dervishaj: Çdo person i cili është marr dhe merret me volejbollin duhet të ketë hapësirën e vet dhe jo i gjithë Komuniteti i volejbollit të udhëhiqet nga 2 apo 3 persona…

“Bota sot”:  A do të pranoni ta drejtoni Kombëtaren e Kosovës, meshkujt apo femrat. nëse iu ofrohet kjo mundësi?

Bujar Dervishaj: Jo, sepse caku im është të merrem me startimin dhe udhëheqjen e Akademisë së Trajnerëve, që të kemi trajner sa me kualitativ në të ardhmen. 

Ndërsa para disa viteve mu ofrua posti që ta udhëheq Kombëtaren e meshkujve, mirëpo nuk u realizua sepse ideja ime ishte që të grumbulloj lojtarë të rinj dhe të punojmë në një cikël prej 3 viteve e pastaj të dalim në arenën ndërkombëtare e të shohim se ku jemi. Mirëpo nuk u dakorduam se udhëheqësit e atëhershëm dëshironin gjithsesi të dalin jashtë dhe rezultatet që kishin pastaj ishin katastrofale… 

Herën e fundit që bëra një koment dhe dikush nga komuniteti i volejbollit kishte thënë (mbet anonim deri tash) se Bujari nuk është në Kosovë dhe po gjuan nga korneri me moton: Se nuk i njeh gjërat se si shkojnë këtu!? Mirëpo iu përgjigjem se unë i di gjërat shumë më shumë se ju që mendoni dhe goditjet e mija nga korneri mund të shënoj edhe gol direkt sepse sporti im i parë ishte futbolli dhe isha golashënuesi me i mirë në Ligën e pionierëve me 19 gola. 

Për në fund, mua me interesojnë së pari vetëm projektet dhe puna konkrete e pastaj shoqëria apo kafja nëpër restorantet e bukura të Prishtinës.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat